BAUKAU, 18 Marsu 2025 (TATOLI)—Autoridade lokál husu Governu Sentrál fó atensaun ba setór tolu hanesan Edukasaun, saúde no Agrikultura tanba konsideradu importante maibé sei falta iha baze.
Xefe Suku Fatulia, Postu Administrativu Venilale, Munisípiu Baukau, Angelo Moises Pereira, hateten razaun presiza tau atensaun ba setór tolu referidu tanba iha Fatulia sei falta no menus fasilidade nune’e seidauk responde ba Planu Estratéjiku Dezenvolvimentu Nasionál (PEDN).
“Tolu ne’e setór ne’ebé importante ba nasaun, tan ne’e presiza tau orsamentu, tanba seidauk efetivu,” Xefe Suku Fatulia hateten iha Sentru Konvensaun Baukau (CCB-sigla portugés), Vila Antiga, Baukau, tersa ne’e.
Angelo Freitas haktuir katak durante ne’e setór saúde sei menus fasilidade no ai-moruk hodi atende komunidade iha área rurál.
Aleinde ne’e, nia hatutan, setór agrikultura mós kontinua hasoru difikuldade tanba kondisaun irrigasaun estragada, to’o ohin loron la funsiona.
Notísia relevante: MAE konsulta planu OJE 2026 ba Autoridade Baukau
Nune’e mós, nia husu atu reabilita fasilidade edukasaun ne’ebé durante ne’e difikulta estudante sira iha prosesu aprendizajen.
“Fasilidade ba edukasaun nian menus tebes oinsá bele hakbiit ita-nia oan sira,” Angelo akresenta.
Nia sujere, liuhusi konsulta planeamentu orsamentál tinan-2026 bele hadi’a no dezenvolve di’ak liután setór tolu ne’ebé mensionadu nune’e komunidade iha área rurál bele sente ukun rasik aan.
Entretantu, Suku Fatulia hamutuk aldeia haat kompostu husi Bahadato, Osso-uaque, Uatulia-ana no Uai-to-bono ho totál populasaun hamutuk 2.721 husi totál uma-kain 688.
Tuir PEDN 2011-2030 katak husi tinan 2011 to’o 2015, setór saúde no edukasaun mellorada no husi tinan 2015 to’o 2030 setór agrikultura ho setór sira seluk bele sustentável hodi garante soberania ai-han iha Timor.
Jornalista: Natalino Belo
Editór: Xisto Freitas da Piedade
