DILI, 18 Marsu 2025 (TATOLI)—Diretór Interinu Servisu Migrasaun (SM), Juvinal Castelho, hateten durante Janeiru to’o Fevereiru 2025, Servisu Migrasaun rekolla reseita ba kofre Estadu hamutuk $4.013,80.
“Husi parte Servisu Migrasaun inisiu Janeiru to’o mai Fevereiru kolleta taxa $4.013,80,” Juvinal ba jornalista sira iha nia kna’ar fatin, edifísiu Servisu Migrasaun, Vila Verde, tersa ne’e.
Castelho esplika katak reseita sira-ne’e mai husi parte tolu. Primeiru, pontu entrada fronteira sira inklui aeroportu. Segundu, provasaun vistu. Terseiru, operasaun nian liga aplikasaun koima ba sidadaun estranjeira ne’ebé viola vistu.
Nia dehan, durante Janeiru to’o Feveiru 2025, Servisu Migrasaun rejista ema na’in-68 mak viola vistu. Sira utiliza fali vistu turista hodi halo atividade profisionál.
“Ne’e mak ami halo prosesu administrativu no prosesu delijénsia sumária sira selu koima,” nia afirma.
Juvinal Castelho haktuir katak durante Janeiru to’o Fevereiru sidadaun ne’ebé tama mai territóriu nasionál hamutuk 88.557. Enkuantu, sidadaun ne’ebé sai husi territóriu nasionál durante Janeiru to’o Fevereiru hamutuk 49.182.
“Sidadaun ne’ebé barak liu tama no sai iha territóriu nasionál durante Janeiru no Fevereiru barak mai husi sidadaun Indonézia, tuir Xina no Filipina,” nia informa.
Jornalista: Natalino Costa
Editór: Xisto Freitas da Piedade
