DILI, 19 Marsu 2025 (TATOLI)—Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Orlando Gomes, hateten nia orienta ona Xefe Polísia Tránzitu Munisípiu Dili atu halo identifikasaun ba membru Polísia Tránzitu PNTL Munisípiu Dili ne’ebé mak kria dezentendimentu iha atendimentu Diresaun Nasionál Transporte Terrestre (DNTT), Balide, tersa (18/03).
“Ita hotu-hotu akompaña katak akontesimentu ne’e akontese bainhira membru Polísia Tránzitu Dili halo tratamentu dokumentu iha Diresaun Nasionál Transporte Terrestre, tanba sira dudu malu depois mak mosu dezintendimentu. Tanba ne’e mak ha’u orienta ona Xefe Polísia Tránzitu Dili para halo identifikasaun ba membru referidu para ita bele hatene akontesimentu iha DNTT kauza ne’e saida,” Orlando Gomes hateten ba jornalista sira iha nia kna’ar fatin, Eskuadra Dom Aleixo, kuarta ne’e.
Nia dehan, tuir informasaun preliminária katak membru PNTL ne’e mai husi Departamentu Tránzitu Rodoviária Munisípiu Dili no dehan membru polísia ne’e mai ikus depois ba halai forma uluk tiha iha oin ne’e mak mosu dezentendimentu ho sira-ne’ebé antes forma ona ne’e.
“Dalaruma ita-nia membru tránzitu ne’e la tuir liña formatura ninian no hakat liu ita-nia sidadaun. Tan ne’e, la simu ka la satisfás depois dezintendimentu akontese. Kuandu ita-nia sidadaun sira sai hanesan vítima ka la satisfás, ne’e sira bele mai halo keixa ita bele halo prosesu. Bainhira ita-nia membru ne’e mak sala, entaun ita sei halo prosesu,” nia esplika.
Jornalista: Natalino Costa
Editór: Xisto Freitas da Piedade
