DILI, 19 Marsu 2025 (TATOLI)–Unidade Patrullamentu Fronteira (UPF) liuhusi koordenasaun servisu ho Tentara Nasional Indonesia (TNI) Satgas Yonif 741 Belu, ne’ebé kolokadu iha Postu Motain, konsege halo apreensaun ba sigaru karton hamutuk 27 iha fronteira Motain entre Indonézia no Timor-Leste.
Transasaun illegál ne’e husi área Atapapu (Indonézia) ho ró via marítima atu mai Timor-Leste, maibé la konsege tanba ekipa intelejénsia husi TNI ne’ebé destaka iha fronteira Motain deteta, nune’e kontatu ba UPF hodi halo kedas prevensaun ka halo apreensaun. Na’in ba sasán referidu halai lakon husik hela sasán.
“Apreensaun ba sasán kontra-bandu ne’e hala’o iha sábadu no domingu, semana kotuk,” Komandante UPF, Superintendente Polísia, Euclides Belo, hateten ba Tatoli via WhatsApp, kuarta ne’e.
Belo hateten iha kuarta ne’e (19/3), UPF hamutuk ho TNI kontinua halo servisu koordenada hodi intensifika patrullamentu iha área fronteira Timor-Leste ho Indonézia nune’e prevene atividade kontra-bandu sira.
“Ohin ami hasoru-malu ne’e atu fortifika koordenasaun, komunikasaun, kooperasaun atu halo vijilánsia ba sasán kontra-bandu sira,” nia konklui.
Sasán ne’ebé apreendidu oras ne’e iha UPF nia liman no hein entrega ba autoridade relevante atu prosesa bá-oin.
Jornalista: Natalino Costa
Editór: Xisto Freitas da Piedade
