DILI, 20 Marsu 2025 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek enkoraja graduadu 33 tenke utiliza matenek ne’ebé hetan iha Institutu Defeza Nasionál (IDN) hodi dezenvolve idak-idak nia instituisaun.
“Ofisiál sira-ne’ebé aprende ona iha IDN ho vizaun ida-ne’ebé akadémiku luan kona-ba estilu lideransa jerasaun. Tanba ne’e, husu ba imi idak-idak tenke haburas no haklaken idak-idak nia koñesimentu, abilidade lideransa nian, hodi aplika iha atividade loron-loron nian,” Falur hateten iha nia deskursu iha enserramentu Kursu Estadu Maiór Konjuntu Integradu (CEMCI-sigla portugés) edisaun datoluk, kursu dahuluk ba Kapitaun Portu ba tinan 2024/2025 inklui abertura ba CEMCI edisaun dahaat tinan letivu 2025/2026 ne’ebé hala’o iha Auditóriu Kuartél Jenerál F-FDTL, Fatuhada, Dili, kinta ne’e.
Nia husu ba graduadu sira atu konsolida ekipa no aplika koñesimentu tuir realidade hodi solusiona inovativa ba lakuna no problema sira-ne’ebé instituisaun enfrenta.
Jenerál ne’e louva IDN tanba IDN sai institutu ida-ne’ebé sai sentru ba estudu jestaun lideransa ho ezisténsia liuhusi dalan ne’ebé naruk dezde 2010, maibé konsege hatudu prova katak halo nia papél ida eselente hodi fornese oportunidade ba ensinu peskiza.
Notísia relevante: IDN sosializa kursu CEMCI ba ofisiál F-FDTL no PNTL
Falur mós parabeniza estudante na’in-33 ne’ebé finaliza ona kursu CEMCI no kursu kapitaun portu.
“Ohin hanesan loron haksolok ka orgullu no signifikadu ba PNTL, F-FDTL no funsionáriu públiku sira-ne’ebé frekuenta kursu iha IDN tanba konklui ona edisaun datoluk kursu Estadu Maiór Konjuntu Integradu no edisaun dahuluk Kapitaun Portu nian. Ha’u-nia felisitasaun no parabéns ba ita-boot sira hotu,” nia hateten.
Nia husu, hansesan futuru líder, graduadu sira tenke hatudu ezemplu, tane aas integridade, disiplina no korajen hodi hatutan lideransa iha servisu.
Iha fatin hanesan, Diretór Interinu Institutu Defeza Nasionál, Guilherme Soares, informa kursu CEMCI mai ho komponente haat no unidade kurrikulár lima no envolve husi ofisiál militár ho polísia, no iha pratikamente aula ensinu, separa militár no polísia tanba iha aula ensinu ba kursu ne’e iha siénsia polisiál no siénsia militár.
“Kuandu sira aprende hotu iha idak-idak nia área, sira sei ba aprende iha komponente konjunta integrada iha-ne’ebé sira aprende ona kona-ba ameasa kontemporánia, ameasa naun tradisionál no jeo-estratéjia,” nia haktuir.
Enkuantu, nia hatutan, kursu kapitaun portu ne’e oinsá sira aprende kona-ba kontrolu tasi, oinsá atu asegura tasi, direitu mar, direitu liuliu kona-ba enkudramentu legál sira-ne’ebé bele atua autoridade marítima.
Iha biban ne’e, Reprezentante Graduadu Kursu Estadu Maiór Konjuntu Integradu, Kapitaun Fragata Guido Guterres, hato’o agradesementu ba IDN tanba bele oferese ona Kursu Estadu Maiór Konjuntu Integradu no promete bá-oin sei implementa koñesimentu no esperiénsia ne’ebé durante hetan iha IDN.
Kursu Estadu Maiór Konjuntu Integradu ba datoluk tinan kotuk kompostu husi ofisiál PNTL na’in-haat no ofisiál F-FDTL na’in-11. Kursu dahuluk ba kapitaun portu nian tinan kotuk partisipa husi ema na’in-18. Enkuantu, Kursu Estadu Maiór Konjuntu Integradu ba dahaat iha tinan ne’e ema na’in-14, kompostu husi polísia haat no ofisiál F-FDTL sanulu.
Jornalista: Natalino Costa
Editór: Xisto Freitas da Piedade
