DILI, 20 Marsu 2025 (TATOLI)—Membru Komisaun G iha Parlamentu Nasionál (PN) ne’ebé trata asuntu Edukasaun, Juventude, Desportu no Sidadania, foin lalais halo fiskalizasaun ba munisípiu Bobonaru, Kovalima no Vikeke hodi haree direta kondisaun no prosesu ensinu aprendizajen iha eskola sira.
Prezidente Komisaun G, Armando Lopes, haktuir, fiskalizasaun ne’e kobre eskola balun hahú husi pre-eskolár to’o sekundáriu jerál no tékniku vokasionál.
“Ami to’o iha ne’ebá kuaze problema hanesan profesór sira menus, kadeira no meza menus, sala de aula menus, konstrusaun edukativu agora balun kondisaun ladi’ak ona, merenda eskolár no konsesaun eskolár,” Reprezentante povu hateten iha resintu PN, kinta ne’e.
Notísia relevante : Tinan 2025: ME prevee millaun $113-resin finansia programa lima
Momentu ne’ebá, Dirijente eskola ne’ebé hetan vizita, komunika ba membru Komisaun G hodi hatutan problema sira ne’e ba Ministériu Edukasaun (ME) hodi tau atensaun.
“Iha tinan tuir mai tau orsamentu oinsá bele hadi’a ho neineik bele to’o mandatu tinan-lima bele hadi’a buat barak ona,” Deputadu Bankada Governu husi Partidu Demokrátiku (PD), Armando Lopes, akresenta.
Reprezentante povu ne’e dehan, problema edukasaun labele rezolve iha tempu badak nia laran tanba kada tinan populasaun aumenta.
Iha fatin hanesan, membru Komisaun G no atuál Deputadu Bankada opozisaun husi Frente Revolsionária do Timor-Leste Indepedente (FRETILIN), Sancia Florencia Paixão Bano, haktuir, durante fiskalizasaun, nota katak menus profesór iha eskola maski ministériu halo ona destakamentu foun liuhusi rekrutamentu bolsa kandidatu.
Aleinde ne’e, disiplina ho espesialidade matemátika, língua, no biolojia la kompletu iha eskola sira no iha profesór ida hanorin disiplina rua ka tolu.
Iha mós profesór rekrutadu maibé ME seidauk koloka ba eskola balun maski menus profesór no destakamentu profesór iha diferensa jeográfika munisípiu orijen, tanba ne’e presiza kria kondisaun hanesan hela fatin.
Membru Komisaun mós deteta implementasaun merenda eskolár iha munisípiu balun seidauk realiza to’o agora.
“Ezemplu, ami fiskaliza iha Vikeke horisehik no semana tolu liubá iha Bobonaru no Suai merenda eskolár susar atu realiza tanba prosesu orsamentu tarde, entaun fulan-ida, rua, tolu la konsege halo,” nia katak.
Nune’e, Reprezentante povu ne’e husu ba ministériu tutela atu hadi’a jestaun no kontrola implementasaun merenda eskolár ba fornesimentu no garante kualidade ai-han ba estudante sira.
ME prevee orsamentu $113.098.784 ba tinan 2025 ne’e hodi finansia programa lima, sub-programa 15 no atividade 115.
Jornalista : Nelson de Sousa
Editora : Julia Chatarina
