DILI, 21 Marsu 2025 (TATOLI)—Enkaregadu Negósiu Timor-Leste nian iha India, Francisco Maukura, hateten India apoiu másimu Timor-Leste nia adezaun ba ASEAN tanba Timor-Leste iha poténsia barak.
Maukura hateten, India iha interrese makaas hakarak koopera ho Timor-Leste hodi investe iha área agrikultura hodi bele ajuda Timor-Leste nia dezenvolvimentu liuliu iha ámbitu Timor-Leste nia preparasaun atu adere ba ASEAN.
“Timor-Leste ita haree agora iha poténsia ba investimentu iha área agrikultura nian, India nasaun ida-ne’ebé hakarak tebes atu koopera ho ita hodi investe iha área sira hanesan agrikultura no seluk tan, atu nune’e bele dudu ita-nia dezenvolvimentu,” Maukura hateten ba Agência TATOLI liuhusi WhatsApp, sesta ne’e.
Diplomata timoroan ne’e hateten, Timor-Leste bele konsidera India bele sai hanesan merkadu alternativu iha Azia Súl.
“Daudaun ne’e ita iha asuntu importante barak koordena hela. Ita hakarak liu mak agrikultura, tuir fali mak saúde. Ita haree, India mós halo produsaun ba ai-moruk. Ita mós hakarak, sira investe mós iha IT nian tanba temi kona-ba IT India mós makaas iha mundu, nune’e ita mós hakarak realiza interkámbiu kluturál ho sira. Buat sira-ne’e parte ida atu dudu ita-nia dezenvolvimentu. Bainhira ita tama ba ASEAN, buat sira-ne’e importante tebes,” nia dehan.
Nia hatutan, daudaun ne’e relasaun bilaterál entre Timor-Leste ho India metin tebes ba oin bele realiza akordu servisu hamutuk liuliu iha área importante sira-ne’ebé Timor-Leste presiza.
Tanba ne’e, durante hala’o misaun diplomata iha India. Maukura hasoru malu ho investór lubuk ida no Governante India nian balun hodi ko’alia ona kona-ba futuru kooperasaun entre nasaun rua, no investór barak iha India sei mai vizita Timor-Leste iha tempu besik hodi haree direta Timor-Leste nia potensiál hafoin hakat ba akordu kooperasaun sira.
Aleinde ne’e, Governu esforsu hela atu halo kooperasaun iha área aero atu nune’e bele liga konetividade entre Timor-Leste ho India.
Jornalista : Hortencio Sanchez
Editór : Cancio Ximenes
