DILI, 21 Marsu 2025 (TATOLI)—Prezidente Tribunál Rekursu, Deolindo dos Santos, hateten edifísiu tuan Tribunál Distritál Dili iha Kolmera (TDD) sei sai fatin arkivamentu ba prosesu sira husi Tribunál Rekursu no Tribunál Judisiál Primeira Instánsia Dili.
“Prédiu tuan ne’e ha’u despaxa tiha ona, depois atu uza ba saida mak ita determina. Más, nu-entantu, tanba ita-boot sira hatene prosesu sira Tribunál Rekursu no Tribunál Judisiál Primeira Instánsia Dili nian butuk hela iha cobe house tolu sorin ne’e. Ida-ne’e mak ita organiza sorin ne’e atu lori fali tun bá kraik ne’ebá (edifísiu Tribunál tuan) hodi rai hanesan arkivu,” Deolindo hateten ba Tatoli iha nia kna’ar fatin, Kaikoli, sesta ne’e.
Nia dehan, tempu badak nia laran sei organiza para lori arkivu Tribunál Rekursu no Tribunál Judisiál Primeira Instánsia Dili nian bá tau iha-ne’ebá.
“Despaxu ne’e ha’u orienta para tempu badak nia laran ita organiza hodi lori arkivu Tribunál Rekursu no Tribunál Judisiál Primeira Instánsia Dili bá tau iha-ne’ebá. Tanba edifísiu tuan ne’e sai hanesan edifísiu ba arkivu nasionál hodi konserva prosesu sira husi Tribunál Rekursu no Tribunál Judisiál Primeira Instánsia Dili,” nia konklui.
Jornalista: Natalino Costa
Editór: Xisto Freitas da Piedade
