Ekipa selesaun nasionál Timor-Leste preparadu hasoru Tazakistaun

DILI, 24 Marsu 2025 (TATOLI)–Ekipa selesaun nasionál Timor-Leste “Lafaek” daudaun ne’e estadia ona iha nasaun Tazakistaun hodi enfrenta jogu ho nasaun referidu iha jogu kualifikasaun Tasa Azia 2027.

Notísia Relevante: Ekipa selesaun nasionál halo preparasaun iha Malázia atu hasoru Lebanon-Tazakistan

Treinadór prinsipál selesaun nasionál, Simón Elissetche, hateten ba Agência TATOLI liuhusi rede sosiál WhatsApp (WA) hateten, ekipa ne’ebé nia lidera preparadu ona atu joga kontra Tazakistaun.

“Ami iha ona estratéjia ne’ebé definitivu no prontu, jogadór sira komprende klaru ona planu jogu no aban ami sei joga ho konviksaun no vontade atu enfrenta ho Tazakistaun,” Simón hateten.

Nia dehan, estuda ona forsa jogu Tazakistaun nian maibé ekipa Timor-Leste sei servisu makaas hodi hatudu jogu ne’ebé di’ak atu fó vitoria ba Timor-Leste.

“Ami hatene loos ona forsa prinsipál sira husi Tazakistaun, maibé ami sei halo traballu atu halo sira labele joga ho tranquilidade. Ita-nia objetivu mak atu hadi’a ita-nia dezempeñu, avansa hodi kontinua hatudu rezultadu di’ak. Ami sempre hakarak hatudu rezultadu di’ak. Empata ka manán sei sai buat espetakulár ba ita-nia futeból. Maibé ita tenke komprende katak ita sei hasoru selesaun ida-ne’ebé iha pozisaun karik ranking FIFA100,” nia dehan.

Jogu Kualifikasaun Tasa Ázia AFC 2027, ne’ebe Timor-Leste sei joga hasoru nia adversáriu Tazakistaun iha loron 25 Marsu 2025.

Jogu kualifikasaun Tasa AFC 2027 ronde da-tolu Timor-Leste iha Grupu A hamutuk ho Tazakistaun, Maldivas no Filipina.

Nasaun tolu ne’e, daudaun iha kalsifikasaun FIFA ne’ebé aas liu Timor-Leste, Tazakistaun iha fatin 104, Filipina iha fatin 150, Maldivas iha fatin 162 no Timor-Leste okupa iha fatin 197.

Iha jogu primeiru Timor-Leste sei kontra uluk ekipa ne’ebé forte liu iha grupu A mak Tazakistaun.

Jornalista : Hortencio Sanchez

Editór        : Cancio Ximenes