DILI, 24 Marsu 2025 (TATOLI)–Peskizadór Programa Monitorizasaun ba Sistema Judisiáriu (JSMP-sigla portugés), Luís Oliveira Sampaio, solisita Xefe Estadu José Ramos Horta atu hahú fihir figura ne’ebé mak sei asumi futuru Prezidente Tribunál Rekursu (PTR) no Prokuradór Jerál Repúblika (PJR).
Nia dehan, mandatu atuál Prezidente Tribunál Rekursu, Deolindo dos Santos, inklui Prokuradór Jerál Repúblika, Alfonso Lopez, sei terminadu iha fulan-Abríl, tinan ne’e.
Tuir Konstituisaun Repúblika Demokrátika Timor-Leste, Prezidente Repúblika mak hatudu Prokuradór Jerál Repúblika nian ba mandatu tinan haat, inklui foti Prezidente Tribunál Supremu Justisa nian, ne’ebé eskollidu hosi juíz sira iha Tribunál Supremu Justisa nian, ba tinan haat nia laran.
“Tuir regra, nomeasaun sira hanesan ne’e polítika. Hanesan iha Tribunál Rekursu iha juíz na’in-haat iha-ne’ebá, ne’ebé elejível atu asumi kargu sira hanesan ne’e. Enkuantu, husi Ministériu Públiku nian tuir ami-nia hatene, Prokuradór sira-ne’ebé mak atu elejível ba kargu Prokuradór Jerál Repúblika mak prokuradór sira-ne’ebé iha primeira klase. Ami bele propoin maibé ida-ne’e orsida Prezidente Repúblika sei hili tuir nia konviksaun. Tanba ne’e, ami husu Xefe Estadu hahú fihir ona figura sé mak atu asumi kargu sira-ne’e,” Luis hateten ba jornalista sira iha nia kna’ar fatin, Kolmera, segunda ne’e.
Luís esplika, tuir regra, Konsellu Superiór Majistratura Judisiária no Konsellu Superiór Majistratura Ministériu Públiku mak enkamiña naran juíz no prokuradór sira bá Xefe Estadu hafoin ida-ne’e mak Xefe Estadu sei hili tuir nia konviksaun rasik. Maibé, figura ne’ebé kaer kargu Prezidente Tribunál Rekursu inklui Prokuradór Jerál Repúblika ba mandatu ne’ebé mai ne’e ema tenke elejível.
Rekorda fali katak Prezidente Tribunál Rekursu, Deolindo dos Santos no Prokuradór Jerál Repúblika, Alfonso Lopez, simu pose husi Prezidente Repúblika, Francisco Guterres Lú Olo, iha loron 28 fulan-Abríl 2020 ba mandatu tinan haat.
Jornalista: Natalino Costa
Editór: Xisto Freitas da Piedade
