Deputadu sira preokupa ho impaktu lixu
DILI, 25 Marsu 2025 (TATOLI)–Deputadu Bankada Governu husi Kongresu Nasionál Rekonstrusaun Timorense (CNRT), Saul Salvador, preokupa ho asuntu lixu ne’ebé kontinua sai preokupasaun, nune’e nia husu ba sidadaun hotu atu muda mentalidade no iha konsiénsia atu labele so’e lixu arbiru tanba bele fó impaktu oinoin.
“Lixu fó moras oinoin ba komunidade, halo sidade la furak, fó impaktu ba inundasaun no lixu fó mós impaktu ba gastu boot tanba ita kombate lixu ne’e rasik,” Deputadu hato’o iha Parlamentu Nasionál (PN), tersa ne’e.
Aleinde ne’e, Reprezentante povu ne’e nota mós katak lixu iha Dili laran kontinua barak iha bairu-bairu, maski Governu halo ona esforsu maka’as.
“Saida mak ha’u observa katak, lixu mai husi aktu labarik sira, estudante sira, família kada uma-kain sira, negosiante sira, emprezáriu sira, funsionáriu sira até elite polítiku balun mós soe lixu arbiru iha dalan,” nia akresenta.
Notísia relevante : AMD sei loke konkursu ba kamioneta 75 hodi raut lixu
Nia observa, kada loron komunidade iha Dili bele prodús lixu pur volta tonelada, tanba lixeiru iha Tibar kada loron simu kareta lima ba leten.
Nune’e, Deputadu ne’e fó hanoin ba Governu, dahuluk tanba sidadaun hotu seidauk iha konsiénsia nune’e soe lixu laiha fatin, maibé iha dalan, trotoár leten, valeta laran no uma oin to’o la halo moos.
Daruak, Governu seidauk envolve másimu autoridade suku no aldeia sira mak atu orienta komunidade.
Deputadu ne’e husu mós ba Ministériu Administrasaun Estatál (MAE) atu envolve ona grupu balun ne’ebé halo atividade kombate a lixu, hanesan Movimentu Brigada Xanana ne’ebé hamos hela tasi-ibun, mota ninin, valeta laran di’ak tebes.
“Presiza koloka sira iha suku-suku oinsá lixu ita bele kombate. Tuir fali envolve suku no aldeia orienta bá sira kontrola ida-idak ninia komunidade para aredór iha kada uma-kain tenke hamoos, depois fó hanoin mós bá Ministériu Edukasaun atu fó orientasaun ba kada Diretór Eskola sira atu estudante sira mós bele hatene asegura lixu ne’e,” nia hato’o.
Iha fatin hanesan, Deputadu CNRT, José Virgilio, preokupa tanba sidadaun barak kontinua laiha konsiénsia hodi soe lixu arbiru.
Nune’e mós, Deputadu Bankada Governu husi Partidu Demokrátiku (PD), Mariano Fernandes Xavier Malik, apresia MAE ne’ebé halo esforsu instala fatin lixu iha bairu no dalan boot sira maibé nafatin ezije atu halo jestaun di’ak liután iha kolesaun lixu no hamutuk ho líder komunitáriu halo sosializasaun ba komunidade atu soe lixu iha fatin.
Deputadu ne’e husu mós atu tau-atensaun kontrola bá fatin turístiku sira hanesan Kristu Rei ne’ebé sempre iha vizitante barak husi rai-laran no rai-li’ur.
“Husu mós rekruta ajente atu kontrola soe lixu no bele instala CCTV,’’ nia sujere.
Jornalista : Nelson de Sousa
Editora : Julia Chatarina
