DILI, 26 Marsu 2025 (TATOLI)—Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, louva servisu Polísia Nasionál Timor-Leste (PNTL) durante tinan 25 laran.
Dom Virgílio haktuir katak durante ne’e Polísia halo nia servisu di’ak tebes hodi fó asisténsia ba komunidade liuhusi atendimentu krime no prevensaun krime.
“Primeiru, ita agradese tanba durante tinan 25 ita haree susesu hotu ne’ebé sira (PNTL) halo durante ne’e. Ita haree husi buat ne’ebé sira halo, iha buat barak mak la’o di’ak. Ida-ne’e ita agradese. Ita haree bá kotuk ita mós haree buat balun tenke hadi’a,” Kardeál hateten ba Tatoli hafoin selebra misa agradesimentu ba Aniversáriu PNTL ba dala-25 ne’ebé hala’o iha Sentru Formasaun Polísia (CFP-sigla portugés), Komoro, kuarta ne’e.
Kardeál husu katak bá-oin PNTL tenke mellora servisu sira liuliu oinsá lori servisu besik liubá komunidade.
“Ha’u hanoin bá-oin mak ne’e, polísia tenke serbí duni komunidade liuliu servisu ho profisionál liután entermu atuasaun sira ho di’ak,” líder Igreja ne’e fó hanoin.
Rekorda fali katak aniversáriu Polísia Nasionál Timor-Leste (PNTL) ba dala-25 tinan ne’e ho atividade despostu, divertimentu muzikál, misa agradesimentu, kari ai-funan iha monumentu memória membru polísia ne’ebé mak mate iha 2006 no kontinua ba kari ai-funan iha Jardín Eroi Metinaro, hodi fó onra no gloria ba mártir sira.
Jornalista: Natalino Costa
Editór: Xisto Freitas da Piedade
