DILI, 27 Marsu 2025 (TATOLI)–Autoridade Inspesaun no Monitorizasaun ba Atividade Ekonómika no Sanitária Alimentár (AIFAESA), fó multa ba operadór ekonómiku sira iha área tolu hanesan komérsiu, indústria no turizmu.
Inspetora Jerál AIFAESA, Odete Viegas, esplika aplikasaun multa ne’e iha kategoria ijiene hanesan ambiente serbisu no prazu ba produtu ai-han sira iha restaurante no loja sira.
“Ekipa halo inspesaun ba prosedimentu sira hanesan ijiene iha servisu fatin, ventilasaun no loron vensimentu produtu nian, enderesu negósiu no falsifikasaun data vensimentu produtu nian. Bainhira operadór ekonómiku la prenxe rekizitu sira-ne’e, ami bele aplika koima tanba komete infrasaun sira,” Odete Viegas dehan ba TATOLI , iha Matadouru, Dili, kinta ne’e.
Notísia relevante: AIFAESA taka padaria Brasão tanba komete irregularidade
Nia informa, bainhira empreza sira viola prosedimentu ijiene, ekipa AIFAESA taka provizoriamente hodi hadi’a fatin no kontinua hetan sansaun adisionál.
“Aplikasaun multa ba empreza sira depende ba gravidade infratór sira-ne’ebé komete kona-ba kuantidade produtu no ijiene,” nia relata.
Tuir inspetora katak AIFAESA identifika infratór hamutuk 145 iha trimestre dahuluk no fó prazu loron 30 ba sira atu aprezenta defeza kona-ba krime sira-ne’ebé kometidu. Bainhira la konkorda, sira bele halo rekursu bá Ministériu Públiku.
“Ami notifika infratór na’in-27 husi total empreza 145. Husi ne’e, emprezáriu na’in-hitu mak voluntariamente selu ho montante $5.000,” nia hateten.
Odete haktuir katak AIFAESA konsege aprezenta infratór sira bá Ministériu Públiku, maibé na’in-13 mak konsege bá AIFAESA hodi selu diretamente, tanba ne’e mak halo levantamentu reseita ba trimestre dahuluk hamutuk rihun $35 bá kofre Estadu.
Jornalista: Felicidade Ximenes
Editór: Xisto Freitas da Piedade
