DILI, 28 Marsu 2025 (TATOLI)—Inspetora Jerál Autoridade Inspesaun Fiskalizasaun Atividade Ekonómika, Sanitária no Alimentár (AIFAESA), Odete Viegas , hateten AIFAESA nia papél disemina lei atu garante kualidade seguransa ai-han ba komunidade iha Tibar, Munisípiu Likisá.
“Hanesan ita-boot sira hatene katak AIFAESA nia papél importante oinsá mak atu asegura seguransa alimentár ai-han no la’ós ai-han ba ita-nia populasaun tomak bazeia ba Dekretu-lei númeru: 26/22016 no mós primeira alterasaun ba Dekretu-lei númeru: 29/2024 ne’ebé mak fó kompeténsia ba AIFAESA atu garante kualidade segurasa ai-han iha Timor-Leste tomak,” Odete dehan ba jornalista sira, bainhira ramata halo diseminasaun papél AIFAESA iha Tibar, sesta ne’e.
Nia dehan, AIFAESA presiza divulga informasaun sira-ne’e ba komunidade katak saida mak tama iha kompeténsia AIFAESA nian ne’ebé mak bandu konsumidór labele han no labele asesu.
Notísia relevante: AIFAESA aplika sansaun ba infratór sira iha área tolu
Odete haktuir katak AIFAESA halo diseminasaun ba komunidade Tibar tanba banhira halo destruisaun ba materiál produtu ai-han no la’ós ai-han iha lixeiru Tibar, komunidade labele han basá hahán sira-ne’ebé mak konsumidu ne’e sai risku ba saúde públika ne’ebé mak hamosu moras la hada’et no hada’et.
Iha fatin hanesan, Reprezentante Autoridade Munisípiu Likisá, Fernando da Conçeicão, hateten autoridade apresia servisu AIFAESA hodi halo divulgasaun informasaun relasiona ho papél AIFAESA ba komunidade iha Tibar.
“Ita-nia komunidade barak mak hela iha área Tibar no komunidade barak mak utiliza liu sasán sira iha lixu nian. Entaun, ho divulgasaun informasaun ida-ne’e komunidade bele hatene saida mak labele konsumi,” Fernando informa.
Aleinde ne’e, Koordenadór Seniór ba Asuntu Monitorizasaun, Evaluasaun, Reflesaun no Aprendijazen iha Moras Lepra,Timor-Leste, Ezequiel António de Deus Gomes, esplika ekipa saúde mós sei fó konsulta jerál ba komunidade iha Tibar.
Jornalista: Felicidade Ximenes
Editór: Xisto Freitas da Piedade
