DILI, 28 Marsu 2025 (TATOLI) – Ministériu Agrikultura, Pekuária, Peska no Floresta (MAPPF) nia polítika mak kontinua mentaliza agrikultór hodi halo sira-nia to’os no natar iha munisípiu sira.
Diretór-Jerál Agrikultura, Kafé no Planta Industriál, Martinho Laurentino Soares, hateten ministériu nia esforsu durante ne’e mak ajuda agrikultór sira liuhusi apoia mákina kuda no ko’a hare, tratór fila rai no seluk tan.
Nia esplika katak Governu fó apoiu mákina sira ne’e ba agrikultór sira tanba, daudaun joven sira barak mak laiha interese ba agrikultura no prefere buka moris iha Dili no bá rai-li’ur. Tanba ne’e, Governu tulun to’os-na’in sira atu kontinua hasa’e produsaun iha rai-laran.
Esforsu sira ne’ebé ministériu halo ne’e tanba hetan mós apoiu husi Banku Mundiál, liuhusi programa Sustainable Agriculture Productivity Improvenment Project (SAPIP) iha Timor-Leste.
“Osan ne’ebé Banku Mundiál apoiu liuhusi Projetu SAPIP ne’e hamutuk millaun $21 hodi implementa projetu hahú husi 2017 no sei ramata iha Jullu tinan ne’e”, informa.
Projetu SAPIP ne’e implementa iha munisípiu Lautein, Ainaru, Kovalima, Likisá, Ermera, Bobonaru no Oekusi.
Tuir nia objetivu hosi projetu ne’e atu hadi’a produtividade agrikultór ki’ik sira no fó tulun atu fa’an produtu sira-neʼebé grupu agrikultór sira prodús, liuhosi planu dezenvolvimentu nian hanesan atividade pekuária no veterinária, ortikultura no indústria inovadora.
Esforsu seluk mak ministériu apoia joven sira tuir formasaun agríkola iha Izraél no fila mai halo rasik sira-nia negósiu hanesan kuda modo, prodús ai-kulat no seluk tan.
“Ida-ne’e Governu halo oinsá atu insentiva joven sira iha interese fali ba serbisu agrikultór. Totál joven sira ne’ebé ita haruka ona bá Izraél kuaze besik rihun ida. Ba tinan kotuk ne’e ita haruka tan 140-resin. Tinan ne’e, ita sei haree lai tanba daudaun Izraél ho Palestina funu hela”, salienta.
Notísia relevante: Agrikultór Lotan Batugade presiza tratór hodi hasa’e produsaun agríkola
Jornalista: Arminda Fonseca
Editora: Maria Auxiliadora
