DILI, 28 Marsu 2025 (TATOLI)–Sekretáriu Estadu Komunikasaun Sosiál (SEKOMS), Expedito Loro Dias Ximenes, iha kinta (27/03), hala’o vizita bá Teledifusão de Macau, S. A. (TDM) hodi haree besik dezenvolvimentu no atualiza nota entendimentu ne’ebé asina ona iha tinan 2010.
Iha momentu ne’ebá, Prezidente Rádiu Televizaun Timor-Leste, Empreza Públika (RTTL, E.P) no Sekretáriu Estadu Konsellu Ministru, atuál Ministru Prezidénsia Konsellu Ministru, Agio Pereira maka selebra akordu kooperasaun ho TDM.
Sekretariu Estadu Expedito Loro Dias Ximenes hala’o enkontru ho Diretór TDM, Gilberto Lopes, ne’ebé akompaña husi responsável sira, to’o iha konkluzaun katak parte rua hakarak renova kooperasaun.
Notísia relevante : Tinan Ne’e, SEKOMS Produz Esbosu Radiudifuzaun
Aleinde ne’e, konkorda mós atu troka konteúdu informasaun no realiza formasaun kona-ba radiudifuzaun.
Nune’e, Sekretáriu Estadu hato’o, iha tempu badak sei halo enkontru tékniku liuhusi komunikasaun virtuál entre parte TDM no RTTL, E.P.
Diretór TDM apresia ho intensaun di’ak ba kooperasaun entre mídia estatál rua ne’e no husu atu haruka ona konteúdu ka imajen sira kona-ba dezenvolvimentu Timor-Leste ba TDM hodi bele halo publikasaun atu timoroan no ema hotu iha Macau bele akompaña, maski parte rua seidauk iha renovasaun akordu formalmente.
Enkontru ne’e akompaña mós husi Delegadu ba Macau Fórum, Antonio Ramos ‘Naikoli’.
Teledifusão de Macau nu’udar servisu públiku ba radiudifuzaun, liuhusi kanál televizaun no rádiu inkli plataforma multimídia sira, ne’ebé fornese informasaun no programa divertimentu sira iha Makau no iha mundu tomak.
(TATOLI)
