DILI, 01 Abríl 2025 (TATOLI) – Asistente Eustáquio Guterres sei hatama rekursu hodi kontesta desizaun Tribunál Judisiál Primeira Instánsia Dili ba arguidu MSC ne’ebé xoke matebian Zizelma Maria Fátima Verdial Gonçalves.
Nu’udar asistente ba matebian Zizelma, Eustáquio Guterres prepara rekursu hodi kontesta desizaun Tribunál ne’ebé aplika pena prizaun tinan tolu no suspende ba tinan haat ba arguidu.
“Sai hanesan asistente ba vítima sira, desizaun sai tiha ona, ha’u simu ona notifikasaun ligadu ho despaixu Tribunál nian ba kazu Zizelma Maria Fátima Verdial Gonçalves. Tribunál foin notifika ha’u no ha’u simu tiha ona, nune’e ha’u sei koordena ho Ministeriu Públiku no aban ami sei hatama rekursu hodi kontesta ba iha desizaun Tribunál Judisiál Primeira Instánsia Dili”, Eustáquio Guterres dehan ba jornalista sira iha Kaikoli, ohin.
Defensór Públiku ne’e hateten iha prazu loron 30 nia-laran atu aprezenta rekursu no nia la esplika detallu kona-ba saida mak deskreve iha rekursu ne’e.
“Rekursu agora prontu ona, hein ami subemete hodi kontesta desizaun Tribunál nian”, nia reitera.
Rekorde katak Zizelma Maria Fátima Verdial Gonçalves hetan soke husi arguidu MSC ho motór marka Beat iha área Delta Funan Buras iha loron sesta 13 fulan-Marsu pur volta tuku ualu kalan.
Iha asidente tráfegu ne’e rezulta matebian hakotu iis, nune’e polísia detein kedan suspeitu MSC iha sela durante oras 72.
Iha loron 28 Marsu, liuhusi prosesu sumáriu, Juis Titulár José Gonçalves deside aplika pena prizaun tinan tolu, suspende ba tinan haat ba arguidu MSC no selu indemnizasaun sivíl ba danu patrimoniál ba vítima Zizelma Gonçalves nia família ho valór rihun $5, tanba arguidu nia hahalok halakon ona vítima nia vida.
Ho desizaun husi Tribunál ne’e hamosu dezentendimentu entre família vítima no arguidu, tanba família matebian la satisfás ho desizaun Tribunál nian to’o rezulta arguidu MSC nia feton hetan pankada grave kauza husi ema baku ho kapasete to’o monu fatin no agora sei halo tratamentu iha sentu saúde Vera Krús.
Jornalista: Arminda Fonseca
Editora: Maria Auxiliadora
