BAUKAU, 01 Abríl 2025 (TATOLI)—Ministru Administrasaun Estatál, Tomás do Rosário Cabral, husu autoridade munisipál, postu no suku sira iha Baukau atu serbisu hamutuk no esforsu atu simu polítika implementasaun podér lokál no desentralizasaun administrativa.
Tomás Cabral, esplika Governu sentrál kontinua esforsu atu re-organiza, observa no halo avaliasaun kondisaun mínima ba kada munisípiu sira nune’e husu atu governasaun lokál hanesan sivíl no militár atu junta forsa hamutuk hodi prepara aan di’ak liután hasoru podér lokál iha tinan 2027.
“Ita-boot sira tenke kontribui ba malu di’ak, re-orgaiza Baukau bele hakat uluk ba podér lokál, maibé tenke rona malu,” Ministru Administrasaun Estatál hateten iha Sentru Konvensaun Baukau (CCB-sigla portugés), Vila Antiga, Baukau, tersa ne’e.
Governante ne’e salienta katak desentralizasaun administrativa fó podér rua importante ba autoridade munisipál hanesan administra no finanseira maibé podér polítika sei iha governu sentrál nune’e entidade hotu iha Baukau tenke esforsu maka’as atu projeta aan iha podér lokál mai.
Cabral hateten autoridade presiza implementa programa no ezekuta orsamentu tuir prosedura hanesan orsamentu Programa Nasionál Dezenvolvimentu Suku (PNDS) ne’ebé direta ezekuta iha kada suku no Programa Dezenvolvimentu Integradu Munisipál (PDIM) ne’ebé responsabiliza husi Autoridade Administrasaun Munisipál (AAM) tanba parte husi avaliasaun kondisaun mínima.
Aleinde ne’e, presiza estabelese seguransa no tenke apoia ba Balkaun Úniku ne’ebé reprezenta ona ba governu sentrál iha kada munisípiu liuliu suku sira fornese dadus nune’e bele atualiza inklui sei konstrui tan edifísiu Asembleia Munisipál iha tinan ne’e.
Notísia relevante: Baukau iha kondisaun atu implementa dahuluk podér lokál no desentralizasaun administrativa
“Eleisaun Munisipál sei hili Prezidente Autoridade ho Vise-Prezidente inklui membru asembleia ne’ebé reprezenta husi partidu. Tanba ne’e, tenke preparadu atu konsolida forsa nune’e iha pesoál kualidade hodi defende interese povu,” Tomás Cabral akresenta.
Cabral husu administradór postu sira organiza atu halo sosializasaun ne’ebé sei lidera husi Prezidente Autoridade Munisipál (PAM) nune’e komunidade esklaresida no komprende bainhira implementa podér lokál.
Governu sentrál liuhosi MAE iha planu sei aprezenta kalendáriu implementasaun podér lokál hodi hetan aprovasaun iha reuniaun Konsellu Ministru (KM) nune’e futuru bele ona aplika lei tolu kona-ba polítika desentralizasaun administrativa iha kada munisípiu.
Polítika implementasaun desentralizasaun administrativa bazeia ba Konstitusaun Repúblika Demokratika Timor-Leste (KRDTL) artigu 72, nune’e loke dalan ba kriasaun lei sira hanesan Lei númeru: 23/2023, loron 10 Novembru, sei regulariza implementasaun podér lokál no desentralizasaun administrativa.
Seluk, Lei númeru: 16/2023, loron 31 Maiu, kona-ba finansa munisipál sei regulariza maneira hotu utilizasaun orsamentu no Lei númeru: 22/2021, loron 4 Novembru, kona-ba eleisaun munisipál sei regulariza mekanizmu eleisaun ba membru asembleia no prezidente autoridade munisipál.
Jornalista: Natalino Belo
Editór: Xisto Freitas da Piedade
