BAUKAU, 01 Abríl 2025 (TATOLI)—Governu liuhusi Ministériu Administrasaun Estatál (MAE), tersa ne’e, fó pose ba xefe suku na’in-tolu ne’ebé antes ne’e eleitu iha eleisaun suku foun iha Munisípiu Baukau.
Ministru Administrasaun Estatál, Tomás do Rosário Cabral, hato’o parabéns ba xefe suku foun no husu atu hahú serbisu maka’as liuliu iha faze dahuluk tenke koordena ho suku tuan hodi re-organiza fali suku antes kria no halo programa.
“Ha’u husu tenke serbisu maka’as, re-orgaiza fali imi-nia suku ne’ebé suku tuan husik hela, tenke hatene serbisu mesak,” Ministru Administrasaun Estatál hateten iha Sentru Konvensaun Baukau (CCB-sigla portugés), Vila Antiga, Baukau.
Governante ne’e orienta autoridade postu no munisipál atu apoia suku foun sira liuliu atualiza dadus kona-ba demografia no monografia inklui poténsia sira ligadu ho suku hanesan edukasaun, saúde no agrikultura.
Notísia relevante: Eleisaun Suku husi munisípiu ualu iha 2025
Aleinde ne’e, presiza prenxe no atualiza fali livru 18 no entrega ba postu administrativu no autoridade munisipál antes envia ba nasionál nune’e sai baze dadus hodi halo programa no atividade iha kada suku.
“Xefe suku sira, eleisaun povu mak hili ita-bo’ot sira maibé administrativamente, Governu mak organiza,” Tomás Cabral akresenta.
Xefe Suku foun Caibada Makasae, Júlio Alegria Belo, hateten hafoin simu pose prontu asumi responsabilidade nu’udár autoridade komunitária liuliu halo atendimentu ba povu no kolabora ho Governu lokál no parseiru dezenvolvimentu sira.
“Ha’u komprometidu atu hamutuk ho ha’u-nia povu atu halo dezenvolvementu iha suku,” Júlio Belo promete.
Eleisaun suku foun iha Baukau realiza loron iha 25 fulan-Janeiru 2025 ne’ebé rezulta Suku Builai kandidatu Juvinal da Costa mak eleitu nu’udár xefe suku ho totál votu 523 husi pursentu 52,35.
Suku Caibada Makasa’e kandidatu ho naran Júlio Alegria Belo mak eleitu nu’udár xefe suku ho pursentu 56,87 husi votu 596 no Suku Ueru-Mata kandidatu úniku ho naran Sabino Martins mak eleitu nu’udár xefe suku ho pursentu 100 husi totál votu 264.
Jornalista: Natalino Belo
Editór: Xisto Freitas da Piedade
