BAUKAU, 03 Abríl 2025 (TATOLI)—Autoridade Administrasaun Munisipál (AAM) Baukau klarifika katak manutensaun estrada urbana parte husi prevensaun asidente tráfegu.
Sekretáriu Munisipál Asuntu Planeamentu Investimentu no Dezenvolvimentu, Eduardo Filipe Ximenes, esplika AAM orienta kompañia responsável halo manutensaun tanba estrada urbana diresaun rotunda Vila Nova ba Nagardjo ho kilómetru 3.5 sempre hamosu asidente tráfegu no difikulta movimentasaun transporte tanba konsideradu grave.
“Autoridade deside bolu empreza ne’e mai provizóriu taka estrada ne’e hodi fasilita movimentu transporte públiku sira liuliu ambulánsia tula moras no inan isin-rua sira tanba se la taka sei hamosu asidente tráfegu,” Sekretáriu Munisipál Asuntu Planeamentu Investimentu no Dezenvolvimentu hateten liuhusi konferénsia imprensa iha aula Autoridade Vila Nova, Baukau, kuarta ne’e.
AAM Baukau deside halo klarifikasaun tanba relasiona ho lamentasaun públiku iha rede sosiál kona-ba projetu manutensaun estrada urbana ne’ebé konsideradu sei kontinua estragu tanba ke’e no taka kuak.
Eduardo Ximenes salienta katak obra referida antes ne’e implementa tarde tanba kompañia responsável dúvida ho lokál projetu nune’e AAM deside kompañia halo manutensaun hodi ezekuta projetu, liuliu prevene asidente tráfegu iha Baukau Vila tanba Ministériu Obra Públika (MOP) realiza ona kontratu ho kompañia iha tinan 2023.
“Kuandu estrada kuak sira-ne’e la taka, rezulta ema hetan dezastre liuliu inan isin-rua, sé mak bele responsabiliza asidente tráfegu ne’e?,” Eduardo Ximenes kestiona.
Notísia relevante: CAC preokupa projetu manutensaun estrada urbana Baukau
Eduardo Ximenes husu sosiedade Baukau atu entende katak projetu referida manutensaun rutina, laiha relasaun ho reabilitasaun estrada urbana tanba iha faze verifikasaun husi Ajénsia Dezenvolvimentu Nasionál (ADN) no sei aprova iha Konsellu Administrasaun Fundu Infraestrtutura (KAFI) antes loke konkursu iha Komisaun Nasionál Aprovizonamentu (CAN-sigla portugés) ne’ebé tuir planu sei implementa iha tinan 2026.
Entretantu, projetu manutensaun estrada urbana Baukau Vila responsabiliza husi kompañia Roman Grigo Unipessoal, Lda, totál orsamentu ba obra ne’e rihun $600 no distánsia kilómetru 23 no tipu serbisu cor simente.
Akordu ba obra ne’e asina iha Juñu 2023 ho numéru KP/EO/MOP/23018, nu’udár akordu serbisu rutina manutensaun no sei termina kontratu iha Jullu tinan ne’e.
Jornalista: Natalino Belo
Editór: Xisto Freitas da Piedade
