BAUKAU, 03 Abríl 2025 (TATOLI)—Autoridade Administrasaun Munisipál (AAM) Baukau seidauk simu karta notifikasaun ruma kona-ba preokupasaun Komisaun Antí Korrupsaun (CAC-sigla portugés) relasiona ho projetu manutensaun estrada urbana iha Baukau Vila.
Sekretáriu Munisipál Asuntu Planeamentu Investimentu, Eduardo Filipe Ximenes, esplika projetu manutensaun estrada urbana Baukau Vila kompeténsia iha Ministériu Obra Públika (MOP) nasionál ne’ebé asina ho kompañia responsável iha tinan 2023, nune’e AAM Baukau orienta kompañia halo manutensaun tanba konsidera projetu referidu tarde iha implementasaun.
“Kona-ba preokupasaun ne’ebé hato’o husi CAC ne’e parte husi observasaun maibé atualmente seidauk iha nota informasaun ruma mai AAM Baukau kona-ba implementasaun projetu manutensaun estrada referida,” Sekretáriu Munisipál Baukau hateten iha Autoridade Administrasaun Munisipál Vila Nova, Baukau, kuarta ne’e.
Eduardo hateten AAM ezije atu projetu referidu implementa lalais tanba iha ona selebrasaun kontratu no atu prevene mosu asidente tráfegu liuliu iha área rotunda Vila Nova to’o Nagardjo ne’ebé konsideradu grave.
Notísia relevante: CAC preokupa projetu manutensaun estrada urbana Baukau
Enkuantu, kona-ba reabilitasaun estrada urbana ho totál kilómetru 23 iha Baukau Vila atualmente sei iha faze verifikasaun iha Ajénsia Nasionál Dezenvolvimentu (ADN) no sei kontinua ba Komisaun Nasionál Aprovizonamentu ne’ebé tuir planu sei implementa iha tinan 2026.
Antes ne’e, Komisáriu CAC, Rui Pereira dos Santos kestiona projetu manutensaun estrada urbana tanba iha tinan 2026 sei sobu fali relasiona ho planu reabilitasaun estrada nune’e konsideradu dupla gasta despeza Estadu.
Tuir planu, CAC liuhosi ekipa téknika sei halo inspesaun ba obra referida no rekomenda atu AAM Baukau husu kompañia responsável ateru de’it rai-mutin ba estrada kuak sira nune’e minimiza despeza Estadu no prevene asidente tráfegu.
Entretantu, projetu manutensaun estrada urbana Baukau Vila responsabiliza husi kompañia Roman Grigo Unipessoal, Lda, ho kustu orsamentu rihun $600, distánsia hamutuk kilómetru 23.
Akordu ba obra ne’e asina iha Juñu 2023 ho numéru KP/EO/MOP/23018, nu’udár akordu serbisu rutina manutensaun no sei termina kontratu iha Jullu tinan ne’e.
Jornalista: Natalino Belo
Editór: Xisto Freitas da Piedade
