DILI, 03 Abríl 2025 (TATOLI)—Juiza Administradora Tribunál Judisiál Primeira Instánsia Dili (TJPID), Edite Palmira dos Reis, hateten komunika ona Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, atu koloka tan membru polísia na’in-lima hodi haforsa seguransa iha Tribunál nune’e prevene problema akontese iha Tribunál.
“Iha-ne’e (Tribunál), ita-boot sira hatene polísia na’in-rua mak halo seguransa. Ita hatene katak edifísiu Tribunál ne’e boot, área mós luan tebes-tebes, tan ne’e presiza duni seguransa adisionál,” Edite hateten ba jornalista sira iha nia kna’ar fatin, Tribunál Judisiál Primeira Instánsia Dili, Kaikoli, kinta ne’e.
Pur-enkuantu, nia dehan, sira husu polísia to’o lima más depende sira (Komandu Polísia) disponibiliza hira.
Juiza Administradora Tribunál Dili ne’e hateten, hahú fulan-Abríl sé mak atu mai tuir julgamentu iha Tribunál ka sé mak atu sai sasin iha Tribunál no partisipa iha julgamentu, tenke tau nia eleitorál ka billete identidade iha portaun entrada Tribunál nian nune’e parte seguransa bele halo identifikasaun.
Antes ne’e, mosu konfrontasaun entre família vítima Zezilma Maria Fátima Verdial Gonçalves ho família suspeitu iha Tribunál, relasiona ho Tribunál fó liberdade ba suspeitu ne’ebé soke-mate matebian Zezilma iha zebra cross leten, área Delta, Komoro, 15 Marsu 2025.
Tuir kronolójia ne’ebé fó sai husi vítima nia aman Jaime do Rego Gonçalves katak vítima hetan soke iha zebra cross leten monu ho distánsia ne’ebé dook (besik metru 8). Bainhira Zezilma monu, nia maun mak halai bá foti no hetan ajuda husi mana ida tula iha kareta hodi lori bá klínika Komoro (Kampung Baru). To’o iha Kampung Baru, doutór sira labele atende ona hafoin transporta fali bá Hospital Nacional Guido Valadares (HNGV) maibé la konsege salva vida.
Jornalista: Natalino Costa
Editór: Xisto Freitas da Piedade
