DILI, 03 Abríl 2025 (TATOLI) – Repúblika populár Xina liuhusi provínsia Hunan, oferese apoiu unidade karreta tolu ba Munisípiu Manatutu, nu’udar meiu ida atu fortalese relasaun amizade no kooperasaun entre Governu Xina no Timor-Leste, hodi kontribui ba dezenvolvimentu setór saúde no mós hadi’a kualidade atendimentu saúde ba populasaun Manatutu.
Apoiu ne’e simu hosi Ministériu Administrasaun Estatál (MAE) no entrega ba populasaun Manatutu.
Reprezentante Embaixadór Xina iha Timor-Leste, Xu Danyang, hateten, kooperasaun provinsiál sai hanesan destake ida husi kooperasaun entre Xina no Timor-Leste iha área oin-oin. No, nia rekoñese onra ida ba sira no mós agradese MAE, inklui Ministériu Saúde (MS) no Munisípiu Manatutu hodi apoia saúde entre nasaun rua, iha ámbitu kooperasaun ne’e.
“Doasaun ambulánsia ne’e hanesan hatan ba nesesidade urjente povu Timor-Leste nian, no mós reflete Xina nia apoiu ba tempu-naruk no firme ba dezenvolvimentu kuidadu médiku iha Timor-Leste nian, hein katak, viatura sira-ne’e bele ajuda hasa’e nívél atendimentu médiku iha Munisípiu Manatutu. No, nu’udar realizasaun ikus liuhusi kooperasaun provínsia Hunan no Munisípiu Manatutu no refleta povu amizade husi Xina ba Timor-Leste”, Embaixadór ne’e hateten.
Diplomata Xinés ne’e konsidera, iha tinan hirak ikus ne’e relasaun entre Xina ho Timor-Leste iha progresu boot. Importante amizade entre provínsia Hunan ho Munisípiu Manatutu sai besik liután no iha fulan-Maiu tinan halo selebrasaun tinan sanulu hodi selebra amizade, no iha fulan uutobru tinan kotuk, MAE lori prezidente Munisípiu na’in hitu iha Timór hodi vizita provínsia Hunan.
Enkuantu, Ministru Administrasaun Estatál, Tomas do Rosário Cabral rekorda, apoiu ne’e mai husi provínsia Hunan, ne’ebé uluk sira asina tiha akordu. Katak, iha tempu ne’ebá Kayrala Xanana Gusmão mak sei asumi knaar hanesan Prezidente Repúblika, tanba la’e ema hanoin dehan apoiu ne’e ba de’it Manatutu.
“Ema dehan akordu sidades amigas, amizade. Sira mai iha ne’ebá, mai kedas iha tinan-2008, mai ita husu komunidade iha ne’ebá i sira asina primeiru akordu ne’e ho Primeiru-ministru, depois kontinuasaun fali ha’u asina kala tolu hanesan ne’e, i depois ikus ita halo selebrasaun tinan sanulu ba kooperasaun”, Ministru ne’e haktuir.
Governante ne’e haktuir, iha fulan-Outubru tinan kotuk sira vizita provínsia Hunan no propoin ba sira bele halo mós alargamentu kooperasaun ba munisípiu balun, programa ida-ne’e la’ós apoiu de’it ba ne’e, maibé sira apoiu mós ba iha agrikultura ba produsaun.
“Ambulánsia tolu ne’e simu iha Outobru tinan kotuk. Iha ne’ebá ita haree katak doasaun povu provínsia Hunan-Xina ba iha povu Munisípiu Manatutu, agora autoridade sira iha Munisípiu maka tenke jere ema nia apoiu ne’e, tanba sira sei mai beibeik haree, dehan katak ita uza ema nia apoiu ne’e ho didi’ak kala’e”, nia aprofunda.
Ho apoiu ne’e, Prezidente Autoridade Munisípiu Manatutu, Luís Fernandes hateten, “Hodi populasaun Manatutu nia naran hakarak agradese ba Governu Xina liuhusi provínsia Hunan, ne’ebé antes ne’e kria tiha ona amizade entre Munisípiu Manatutu ho Hunan, iha tinan sanulu ba kotuk, agora atu tama ona tinan sanolu resin-ida. Aumenta ho doasaun ambulánsia ida-ne’e, aumenta tan lista lubun boot ida ne’ebé Munisípiu Manatutu simu”.
Autoridade munisipál ne’e informa, primeiru mak sira dezenvolve relasaun ho Munisípiu Manatutu iha setór agrikultura. No, iha fulan kotuk liubá Manatutu simu tan mákina perfurasaun bee ida no agora daudaun simu tan ambulánsia. Lista(apoiu) lubun boot ida husi provínsia Hunan ne’ebé oferese ba Manatutu.
“Hanesan lasu amizade entre Manatutu ho provínsia Hunan, ami seidauk fornese saida mak Manatutu halo ba Hunan. Infelizmente, ami-nia proposta atu husu ba Governu Hunan karik, universitáriu sira hakarak ba peskiza iha Munisípiu Manatutu ho laran luak ami simu ita-boot sira-nia universidade atu halo peskiza iha ne’ebá”, nia garante.
Entretantu, totál karreta ambulánsia ne’ebé Manatutu iha hamutuk sanulu ona, no kareta ambulánsia ne’e hetan bensaun direta husi amu-lulik. No, partisipante ba seremómia ne’e mak hanesan Ministra Saúde, Sekretáriu Estadu Asuntu Toponómia no Urbana, Sekretáriu autoridade Munisipál, Prezidente autoridade munisipál Manatutu, Padre no konvidadu seluk.
Jornalista: Alexandra da Costa
Editór: Rafael Ximenes de A. Belo
