DILI, 03 Abríl 2025 (TATOLI)—Juiza Administradora Tribunál Judisiál Primeira Instánsia Dili (TJPID), Edite Palmira dos Reis, hateten Tribunál Móvel ba munisípiu haat hanesan Aileu, Ermera, Likisá no Dili kontinua la’o normál.
Nia dehan, Tribunál Judisiál Primeira Instánsia Dili konta ho área jurizdisaun munisípiu haat mak Aileu, Ermera, Likisá no Dili no Tribunál Móvel ba munisípiu haat ne’e kontinua la’o.
“Durante ne’e, Tribunál Móvel la’o. Tribunál Móvel ne’e halo julgamentu ba área jurizdisaun Aileu, Ermera, Dili no Likisá,” Edite tenik ba jornalista sira iha nia kna’ar fatin, Kaikoli, kinta ne’e.
Nia esplika, prosesu julgamentu móvel depende ba juíz sira-nia disponibilidade, kuandu sira laiha ajenda julgamentu, entaun juíz sira mak koordena malu bele realiza julgamentu móvel iha munisípiu.
“Julgamentu móvel tuir regra ne’e, fulan ida antes juíz sira tenke ajenda ona no submete pedidu ba Tribunál Rekursu. Kuandu hetan ona aseitasaun entaun juíz bele bá halo julgamentu móvel,” Edite informa.
Nia dehan, juíz sira atu bá halo julgamentu, Tribunál Móvel tenke lori prosesu tolu-nulu.
“Sira bá halo julgamentu ne’e lori laptop no printer. Kuandu desizaun hotu sira notifika kedas. Ha’u hanoin Tribunál Móvel ne’e iha efeitu tanba durante ne’e bele halo redusaun ba prosesu ne’ebé iha,” nia tenik.
Edite hateten Tribunál Móvel nu’udár polítika ida oinsá hakbesik justisa bá povu.
“Ita haree ita-nia infraestrutura no kondisaun ekonómika limitadu, tan ne’e ita halo julgamentu móvel para lori julgamentu besik ba povu,” nia afirma.
Juiza Administradora Tribunál Dili ne’e salienta katak durante ne’e Tribunál Móvel halo ba Munisípiu Ermera mak barak liu, segundu Munisípiu Aileu.
Jornalista: Natalino Costa
Editór: Xisto Freitas da Piedade
