DILI, 05 Abríl 2025 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa akompañada ho espoza hakat bá iha Masjid An-Nur, Kampung Alor, kumprimenta komunidade Musulmana.
Iha vizita ne’e, Komisáriu Jerál Polísia Henrique da Costa husu ba komunidade Musulmana iha Timor-Leste atu kontribui bá iha pás no estabilidade.
“Vizita ne’e atu kumprimenta sira (komunidade Musulmana) tanba iha loron hirak bá kotuk komunidade Musulmana sira selebra loron Idul Fitri ninian. Mezmu iha tempu ne’ebá ami la mai, tanba preokupa ho servisu, tanba ne’e ohin ami mai iha-ne’e, atu mai kumprimenta komunidade iha-ne’e. Ida-ne’e la’ós buat foun ida. Iha tinan kotuk mós hala’o vizita hanesan ne’e,” nia dehan ba jornalista sira iha Masjid An-Nur, Kampung Alor, sesta ne’e.
Henrique husu bá iha Prezidente Fundasaun An-Nur ho estrutura sira nafatin halo komunikasaun ho parte seguransa ligadu ho asuntu seguransa nian bele kontatu hodibele atende.
Iha biban ne’e, Komandante Jerál ne’e hato’o mós agradesementu bá iha eskola An-Nur ne’ebé mak iha loron hirak bá kotuk bele partisipa atividade marsa no desportu futsal hodi komemora loron polísia nian.
“Ohin ami mós hato’o katak iha programa komandu ninian mak hanesan polísia vizita bá iha eskola no vizita bá iha universidade. Entaun, ohin ita mós ko’alia ho Prezidente Fundasaun katak iha tempu badak ami-nia ekipa polísia komunitáriu, tránzitu no investigasaun ninian sei mai hasoru-malu hodi realiza programa vizita eskola ninian,” Henrique informa.
Nia hateten, hanesan autoridade seguransa tenke tau-matan ba ema hotu-hotu, la haree kona-ba relijiaun saida de’it, maibé hanesan polísia nafatin garante seguransa bá ema hotu, tantu maihusi estranjeiru.
Iha fatin hanesan, Prezidente Konsellu Fundadór Fundasaun Masjid An-Nur, Abdullah Said Sagran, hato’o agradesimentu boot ba Komandante Jerál PNTL tanba vizita ida-ne’e hatudu katak PNTL iha atensaun ba komunidade Musulmana iha Timor-Leste.
Nia informa ba PNTL katak komunidade Musulmana halo jejún durante loron 30 entaun ida-ne’e momentu ida atu hasa’e fé hodi halo mudansa espirituál.
Jornalista: Natalino Costa
Editór: Xisto Freitas da Piedade
