DILI, 08 Abríl 2025 (TATOLI)—Komandu Polísia Nasionál Timor-Leste (PNTL), tersa ne’e, demite membru polísia ida ho inisiál MM tanba envolve krime uza arma tiru sidadaun iha Tasi-Tolu iha tinan 2021.
Desizaun ne’e Komandu Jerál PNTL foti tanba bazeia ba desizaun Tribunál Judisiál Primeira Instánsia Dili (TJPID) ne’ebé aplika pena prizaun tinan neen ba MM tanba provadu katak nia komete krime uza arma tiru sidadaun.
Desizaun Tribunál ne’e sai iha loron 8 fulan-Abríl tinan ne’e, iha-ne’ebé aplika pena efetivu tinan neen ba membru polísia MM no membru Polísia Nasionál Timor-Leste ezekuta kedas desizaun Tribunál hodi lori arguidu bá prizaun Bekora hodi kumpri pena prizaun tinan neen.
“Ha’u fó orden atu halo detensaun no lori bá estabelesimentu prizionál atu kumpre pena,” Juiza Ercilia de Jesus dehan hanesan sita iha mandandu detensaun kondusaun prizionál ne’ebé Tatoli asesu, tersa ne’e.
Mandadu ne’e mós sita karik bainhira hala’o detensaun, tenke entrega orijinál mandadu ne’e nian ba vizadu.Tenke sertifika mós oras no loron ba detensaun ne’e, bainhira halo ona detensaun.
Molok membru PNTL ho inisiál MM lori bá prizaun Bekora, iha tersa (8/4) ne’e, tuku 13:30 Otl, membru PNTL referida sei liuhusi Komandu PNTL Munisípiu Dili hodi hein família sira lori nia ropa no konversa ho nia família molok lori nia bá prizaun Bekora hodi kumpri pena ne’ebé Tribunál aplika ba nia.
Tuir obrservasaun Tatoli iha terenu katak Segunda Vise-Prezidente Parlamentu Nasionál, Maria Terezinha Viegas mós halo vizita bá membru PNTL referidu molok lori bá Prizaun Bekora.
Prezensa Maria Terezinha Viegas hanesan jestu solidariedade ba membru PNTL ne’e tanba membru referidu nu’udár eskoltu hodi fó seguransa ba Vise-Prezidente Parlamentu Nasionál ne’e.
Jornalista: Natalino Costa
Esditór: Xisto Freitas da Piedade
