DILI, 09 Abríl 2025 (TATOLI)—Sub-Inspetora Jerál Autoridade Inspesaun no Fiskalizasaun Atividade Ekonómika Sanitária no Alimentár (AIFAESA,I.P), Quitéria da Costa, hateten ekipa konjunta husi AIFAESA no Inspesaun Jerál Traballu taka permanente loja Seara iha Praia dos Coqueiros, Dili, tanba komete irregularidade beibeik.
“Bazeia ba ami-nia planu inspesaun regulár, hanesan ami halo loron-loron ho ekipa konjunta sira, iha kapitál Dili, entaun ami hetan keixa husi konsumidór sira katak sira bá hola hahán iha loja Seara, hetan modo-tahan, ai-fuan, na’an sira-ne’ebé mak espiradu ona. Entaun, ami-nia ekipa tún kedas hodi haree direta katak iha duni sasán sira-ne’ebé mak espiradu no estragadu. Ida-ne’e mak ami deside taka permanente,” Quitéria da Costa dehan ba TATOLI iha nia kna’ar fatin, Matadouru, Dili, kuarta ne’e.
Notísia relevante: AIFAESA taka provizóriu loja SEARA Praia dos Coqueiros tanba komete iregularidade
Nia esplika, empreza Seara ne’e komete irregularidade beibeik ona, entaun tenke taka permanente atividade negósiu ida-ne’e.
“Sira-ne’e komete irregularidade beibeik, tanba antes ne’e ami taka uluk hodi hadi’a sira-nia ijiene, maibé realidade sira fa’an nafatin sasán espiradu. Entaun, ha’u hanoin sira hakarak koko Estadu. Tan ne’e, ami foti desizaun katak tenke taka permanente,” nia afirma.
Quitéria haktuir loja Seara ne’e nia sanak (cabang) iha Dili tolu kedas inklui munisípiu sira, maibé ekipa AIFAESA kada semana nafatin tún halo inspesaun regulár. Husi inspesaun ne’e mak ekipa deteta irregularidade ruma hodi fó sansaun tuir gravidade ne’ebé mak iha no todan liu mak deside taka.
“Ami dalabarak fó koima tuir gravidade mak hahú husi $250 to’o $75.0000, depois sira halo tuir, ami haruka loke halo atividade negósiu. Maibé, grave nafatin mak deside taka permanente. Hanesan horisehik ami taka, maibé administrasaun la’o nafatin. Agora, kona-ba montante gravidade ba empreza Seara ne’e nia montante ekipa jurídika sira mak aprezenta ba inspetora, depois inspetora mak sei deside empreza ne’e atu selu koima hira,” nia relata.
Nia hatutan, empreza sira-ne’ebé mak fa’an sasán no mós ai-han sira iha kapitál Dili, ekipa AIFAESA kontinua halo inspesaun regulár, nune’e bele prevene ai-han la ijiene iha sira-nia fatin.
“Kona-ba traballadór sira-ne’ebé mak servisu iha loja Seara iha Praia dos Coqueiros, ida-ne’e sei la implika ba traballadór sira no sira nafatin servisu, tanba Seara la’ós de’it iha fatin referidu maibé sira bele bá servisu fali Seara iha fatin seluk ne’ebé mak eziste,” ex-deputada ne’e informa.
Sub-inspetora ne’e tenik, tuir planu, semana ida-ne’e nia laran ekipa AIFAESA sei halo inspesaun iha kapitál Dili, liuliu ba loja no restaurante sira, nune’e hodi haree sira-nia kondisaun ijiene sira.
“Iha fulan-Abríl de’it loja no restaurante sira ne’ebé iha Dili, ami taka ne’e hamutuk 20 inklui loja iha RAEOA, tanba ladún ijiene no mós hahán espiradu,” nia konklui.
Jornalista: Felicidade Ximenes
Editór: Xisto Freitas da Piedade
