DILI, 09 Abríl 2025 (TATOLI)–Diretór Jerál Servisu Rejistu Notariadu, Agostinho Gonsalves Vieira, hateten estoke pasaporte ne’ebé agora daudaun iha Diresaun Jerál Servisu Rejistu Notariadu (DGSRN-sigla portugés) hamutuk 62.000.
“Ita-nia estoke pasaporte loloos ne’e hamutuk 70.000. Ne’e kompostu husi Pasaporte Komún, Pasaporte Diplomátiku no Pasaporte Servisu. Maibé, to’o fulan-Marsu ne’e, ita emite ona 10.000 ne’e ba pasporte tolu ne’e hotu. Agora, estoke pasaporte hela 62.000,” Agostinho hateten ba jornalista sira iha nia kna’ar fatin, Kolmera, kuarta ne’e.
Nia dehan, atendimentu pasaporte iha Diresaun Jerál Servisu Notariadu la’o normál no iha ema forma naruk.
“Ita-boot sira haree rasik ho matan, atendimentu emisaun ba pasaporte iha notariadu ema la dudu malu ona. Ita-boot sira haree laiha tan ona ema hamriik naruk tanba ita hahú halo mudansa jestaun servisu,” Agostinho haktuir.
Nia esplika, ajendamentu online Governu estabelese ona balun bele liuhusi ne’e. Kuandu hirak ne’ebé la konsege liuhusi ajendamentu online bele lori bá iha Gabinete Diretór Jerál despaxu hodi halo kedas atendimentu.
“Funsionáriu sira ne’ebé mak iha Diresaun Jerál Servisu Notariadu ne’e sempre halo atendimentu. Kuandu halo pasaporte loron ida ho valór $100 ne’e ba loron ida tenke foti kedas. Ne’ebé, laiha dehan pasaporte loron ida foti semana ida ka to’o fulan ida, ne’e laiha,” nia konklui.
Jornalista: Natalino Costa
Editór: Xisto Freitas da Piedade
“
