DILI, 10 Abríl 2025 (TATOLI)—Funsionáriu rekrutadu na’in-122 husi Sekretaria Estadu Terra no Propriedade, kinta ne’e, simu pose, ho objetivu atu haforsa forsa traballu iha Sekretaria Estadu Terra no Propriedade liuliu Diresaun Jerál Terra no Propriedade ba kestaun levantamentu rai Estadu iha nasionál to’o munisípiu.
“Funsionáriu foun hirak-ne’e sei servisu iha Diresaun Jerál Terra no Propriedade ne’ebé sei destaka iha nasionál to’o munisípiu. Hirak-ne’e hotu atu kontribui ba esforsu sira iha levantamentu sira-ne’ebé ita tenke halo, levantamentu sistemátiku no levantamentu separadis ne’ebé ita halo,” Sergio Hornai hateten ba jornalista sira hafoin hamutuk ho Komisaun Funsaun Públika fó pose ba funsionáriu foun rekrutadu referidu, iha Auditóriu Ministériu Justisa.
Nia esplika katak funsionáriu foun na’in-122 ne’e sei fahe ba nasionál ema na’in-sanulu no sei destaka mós ba munisípiu kada munisípiu ema na’in-sanulu.
“Funsionáriu foun sira-ne’e molok simu pose sai funsionáriu iha Diresaun Jerál Terra no Propriedade Ministériu Justisa, liuhusi prosesu ne’ebé rigór hafoin selesionadu hanesan funsionáriu hodi simu pose hala’o kna’ar,” Sergio haktuir.
Governante ne’e husu ba funsionáriu foun sira-ne’e bainhira halo servisu tenke iha lealdade, responsabilidade no paisaun.
Entretantu, Komisáriu Komisaun Funsaun Públika asuntu Portefóliu, Agapito da Conceição, husu ba funsionáriu foun Diresaun Jerál Terra no Propriedade atu halo servisu ho responsabilidade no disiplina.
“Hatudu lealdade ba Estadu hodi serbí Estadu, izensaun, dedikasaun no hala’o kna’ar ho responsablidade,” nia konklui.
Jornalista: Natalino Costa
Editór: Xisto Freitas da Piedade
