DILI, 12 Abríl 2025 (TATOLI)—Ró kruzeiru Paul Ganguin Mata Utu husi Fransa, atraka iha Portu Dili, sábadu ne’e, tuku 07:00 Otl, tula turista na’in-236 hodi hala’o vizita ba destinasaun turístiku iha Dili no Maubara (Likisá), durante oras sia.
Turista hirak-ne’e kategória ba parte rua; tour guide no tourist independent, katak iha turista na’in-103 mak sei hala’o vizita ba fatin rua ne’e ho mini bus ne’ebé organiza husi kompaña Bounty Timor Tours no turista seluk hala’o vizita depende ba sira-nia hakarak.
“Iha balun bolu hanesan independent tour. Sira bá ho kamioneta no balun taxi. Antes ne’e, define mós bá vizita Ermera, maibé kanseladu tanba pakote kuandu la to’o ema na’in-20, entaun husi ró la sujere atu bá tanba la tama kritéria,” Diretór Kompañia, Platão Lebre, ba jornalista sira iha Portu Dili.
Jestór ne’e informa, ró ne’e hala’o viajen husi Darwin (Austrália) mak to’o iha Timor no aleinde tula turista ne’ebé temi iha leten, iha mós tripulante hamutuk 218.
“Sira iha oras-ualu, katak City Tour hala’o durante oras haat iha Dili no iha Maubara oras lima. Entretantu, Dili City Tour sei hahú vizita husi Kristu-Rei, Muzeu Rezisténsia, Semitériu Santa-Krúz no ikusliu iha Merkadu Tais Kolmera,” nia esplika.
Iha fatin hanesan, turista husi Reinu Unidu, Alice Kim Kate, haktuir ida-ne’e sai hanesan viajen primeiru iha Timor-Leste, espera bele sente konfortável iha-ne’e no nia kontente atu haree paisajen Timor nian.
“Ha’u ohin haree ona dansa kultura Timor nian, ne’ebé furak loos. Ha’u mós hakarak koko produtu sira iha-ne’e, hanesan hahán. Espera iha ha’u-nia vizita ida-ne’e, ha’u bele hetan istória ne’ebé furak hodi konta sai iha ami-nia rai,” turista ne’e espresa.
Totál kamioneta ne’ebé tula turista sira hamutuk neen. Turista sira husi nasaun haat kompostu husi Fransa, Amérika, Austrália no Reinu Unidu. Hafoin vizita Timor, sei kontinua bá Labuan Bajo, Nusa Tenggara Timur, Indonézia.
Jornalista: Alexandra da Costa
Editór: Xisto Freitas da Piedade
