DILI, 14 Abríl 2025 (TATOLI)—Parlamentu Nasionál (PN) liuhusi reuniaun plenária, segunda ne’e, aprova asentimentu dezlokasaun ofisiál Prezidente Repúblika (PR), José Ramos Horta, bá iha Bulgaria, ho votu afavór 37, kontra tolu no abstensaun ualu.
“Ne’ebé asentimentu pasa, Prezidente bele bá,” Prezidente Parlamentu Nasionál, Maria Fernanda Lay, fó sai iha sala plenária.
Tuir termu previstu iha númeru 1 iha artigu 80 aleina ‘h’ númeru 3 artigu 95 konstituisaun repúblika ho meiu ne’e PR solisita ba PN konsentimentu préviu ba dezlokasaun ofisiál ba Bulgaria hodi fó resposta konvite husi Prezidente Repúblika Bulgaria, Rumen Radev, hodi realiza vizita traballu ida iha 22 Abríl 2025.
Notísia relevante : PR Horta ohin dezloka ba Vietname partisipa Fórum Futuru ASEAN 2025
Xefe Estadu mós informa adisionál ba Deputadu sira iha loron 23 Abríl 2025 sei hala’o viajen nu’udar dezlokasaun natureza privadu ba Reinu Unidu hodi hatan ba konvite Reitoria Elton College hodi partisipa palestra ida prevista iha 24 Abríl 2025.
Aleinde ne’e, aproveita oportunidade ne’e sei realiza enkontru ho komunidade timoroan rezidente iha Reinu Unidu organiza husi Embaixada Timor-Leste iha Londres.
Ho meiu ne’e, Xefe Estadu informa sei auzente husi Timor-Leste entre loron 19-28 Abríl 2025.
Jornalista : Nelson de Sousa
Editora : Julia Chatarina
