BAUKAU, 15 Abríl 2025 (TATOLI)—Autoridade Nasionál Lisensiamentu Ambientál (ANLA,IP), tersa ne’e, realiza sosializasaun kona-ba prosesu lisensiamentu ambientál ba autoridade postu no suku iha Munisípiu Baukau.
Prezidente ANLA, Maximiano M.G. de Oliveira, esplika objetivu husi sosializasaun ne’e atu hasa’e koñesimentu autoridade lokál kona-ba prosesu sira relasiona ho ambientál ne’ebé ligadu ho negósiu ekonómiku.
“Ema barak seidauk hatene, prosesu ne’e hanesan ho karta kondusaun. Atu hetan lisensiamentu ambientál iha prosesu tanba atu halo jestaun ba atividade projetu nune’e labele iha impaktu bá ambientál,” Prezidente ANLA hateten iha Salaun Apuramentu Administrasaun Vila Nova, Baukau.
Nia salienta atu hetan lisensiamentu ambientál liuhosi prosesu hanesan presiza iha koñesimentu husi autoridade lokál, dokumentu projetu husi kompañia, iha lisensiamentu negósiu husi Servisu Rejistu Verifikasaun Emprezariál (SERVE,IP), mapeamentu lokál atividade no deklarasaun kona-ba rai.
Maximiano informa katak ANLA sei foti medida bazeia ba Dekretu-lei númeru: 39/2022 kona-ba lisensiamentu ambientál, artigu 34 ne’ebé sita kona-ba sansaun ho maneira notifikasaun antes aplika sansaun ho valór orsamentu husi $5000 to’o $250.000, tanba ne’e importante mak kada kompañia tenke iha maneira jestaun relasiona ho ambientál.
“Autoridade lokál bele informa tutan bá komunidade kona-ba atividade sira-ne’ebé iha impaktu bá ambientál,” Maximiano akresenta.
ANLA,IP iha kompeténsia kona-ba atribuisaun sertifikadu lisensiamentu ambientál tuir Dekretu-lei numéru: 41/2022 kona-ba estatutu ANLA,IP no alterasaun dahuluk Dekretu-lei númeru 39/2022 kona-ba lisensiamentu ambientál setór privadu no públiku iha atividade negósia.
Entretantu, sosializasaun referida partisipa husi Autoridade Administrasaun Munisipál, Administradór Postu Administrativu, xefe suku sira inklui kompañia balun iha Munisípiu Baukau.
Jornalista: Natalino Belo
Editór: Xisto Freitas da Piedade
