DILI, 17 Abríl 2025 (TATOLI)- Defeza husi kondenadu ho inisiál MM, Estaquio Guterres prepara ona rekursu extraordináriu hodi kontesta desizaun Tribunál Judisiál Primeira Instánsia Dili ne’ebé foti deside ho pena efetivu tinan neen tanba envolve iha krime uza arma tiru sidadaun iha Tasi-Tolu-Dili,iha tinan 2021.
Kondenadu MM molok ne’e nu’udar membru ativu Polísia Nasionál Timor-Leste, maibé iha 2021 uza pistola tiru sidadaun ida iha área Tasi-Tolu, ho hahalok MM nian ne’e, iha tersa (8/4), foin lalais, Tribunál liuhusi Juiza Ercilia de Jesus hasai desizaun hodi aplika pena efetivu prizaun tinan-neen tanba faktu provadu MM envolve duni krime uza arma tiru sidadaun.
Tanba, Defeza ne’e dehan kazu ne’e tránzitu injulgadu no tribunál aplika pena efetivu tinan neen fulan neen ba kondenadu MM, maski nune’e sei iha dalan atu halo rekursu.
“Tanba ne’e hanesan defeza ba MM agora daudaun prepara hela rekursu extraordináriu hodi kontesta desizaun Tribunál Judisiál Primeira Instánsia Dili nian ne’ebé aplika pena efetivu tinan neen fulan ne’e ba MM,” Estaquio hateten ba jornalista sira iha Tribunál Judisiál Primeira Instánsia Dili-Kaikoli, kinta ne’e.
Nia dehan, rekursu extraordináriu ne’e lei fó dalan no kuandu iha faktu foun entaun Defeza sei aprezenta iha rekursu referidu, maibé iha rekursu ne’e labele mai ho faktu anteriór.
Notisia relevante:Tribunál julga arguidu MM ne’ebé envolve krime arma branka
Jornalista : Natalino Costa
Editór: Florencio Miranda Ximenes
