Top

“Jesus fase eskolante nia ain halo aan hanesan atan”

Amu parókia Maria Auxiliadora hamutuk ho sarani sira hala'o prosisaun husi Gruta komoro ba to’o krús boot iha foho Golgota hodi selebra Sesta-feira Santa, Dili (18 abríl 2025). Imajen TATOLI/ Antonio Daciparu

DILI, 17 Abríl 2025 (TATOLI)—Pároku Igreja Santu António Motael, Guilhermino da Silva, hateten misa kinta feira santa nu’udár selebrasaun importante tanba iha selebrasaun ida-ne’e simbólu ida hatudu katak Jesus mai iha mundu hanesan servidór hodi fase eskolante sira-nia ain no sai atan.

“Jesus, Nai Lulik boot hakne’ak no fase eskolante sira-nia ain halo aan hanesan atan. Jesus la’ós de’it fó orden maibé nia fó ezemplu ba nai lulik sira katak sai Nai Lulik la’os ulun boot iha altar maibé atan ba Maromak nia povu ne’ebé silu fahe paun, aumezmu tempu fase ain,” Pe. Guilhermino hateten iha nia humilia bainhira prezide missa Kinta-Feira Santa iha Igreja Motael kinta ne’e.

Nia dehan, nai Jesus nia jestu ida-ne’e atu fó hanoin ba ema hotu atu banati tuir katak nu’udár sarani tenke haraik aan no hadomi malu.

“Jesus nai no mestre, hola papél hanesan atan hodi dehan ha’u fese ona imi-nia ain, ne’eduni imi mós sei hanesan ne’e ba malu, imi mós sei banati tuir nu’udár ha’u foin halo. Ho ida-ne’e, klaru tebes ba ita katak selebra eukuaristia ho lisitu katak prontu serní ho domin hanesan Kristu serbí ona,” nia haktuir.

Tuir Padre Guilhermino katak, Jesus la’ós de’it saran nia aan liuhusi susbtánsia paun no tua uvas, maibé mós fó fiar ba apostolu sira ba sira-nia asosiasaun sira bispu sira, padre sira atu halo, selebrasaun ida-ne’e hanesan memória hodi hanoin Jesus.

“Kalan ida-ne’e mai ita reza ba ita-nia bispu sira kreda Katólika nian, ba padre sira kreda Katólika nian, husu atu fiar nafatin ba iha vokasaun santa haraik aan iha nia servisu ba moris santu iha nia moris,” nia dehan.

Nia dehan, missa Kinta-Feira Santa ne’e nu’udá fó hanoin ba bispo no padre hodi servisu di’ak liután sarani sira.

“Husu ami mós iha konvivénsia no ami mós husu atu haforte ami-nia espíritu atu sai eukuaristia moris ne’ebé fahe Kristu-nia domin ho espiritu serbí no sakrifisiu. Ba ita hotu Kristu bolu atu serbí malu iha ita-nia moris rai ne’e nian. Nakonu ho hakmatek ba ita bele moris loloos iha Maromak nia grasa,” nia hateten.

Kinta-Feira Santa

Kinta-feira santa nu’udar kalan domin, haraik-aan no kalan sakrifísiu. Kinta-feira santa hanesan tempu Han-Kalan Ikus, ida-ne’e la’ós hahan baibain tanba iha kalan ne’e mak Jesus harii Santa Eukaristia, hodi oferese Ninia Isin no Ran iha forma paun no tua nian: “Halo ida-ne’e hodi hanoin ha’u.” (Lucas 22:19)

Jestu ida seluk ne’ebé hamosu iha Kinta-Feira Santa mak fase apostolu sira-nia ain, tanba iha sosiedade ida-ne’ebé fase ain mak kna’ar ida ba atan ne’ebé ki’ik liu, Jesus hola kna’ar atan nian no fase ain sira ne’ebé Nia hadomi. “Se Ha’u, imi nia Na’i no Mestre, fase ona imi nia ain, imi mós tenke fase malu nia ain.” (João 13:14).

Jornalista : Natalino Costa

Ediotór    : Cancio Ximenes

Publisidade

Leave a Reply

Latest Post

error: Content is protected !!