Kandidatu traballadór sira bele aprezenta sertifikadu lian inglés ba SEFOPE
DILI, 22 abril 2025 (TATOLI) — Sekretaria Estadu Formasaun Profisionál no Empregu (SEFOPE ) fó hanoin ba kandidatu traballadór sira-ne’ebé antes ne’e ho valór mínimu atu aprezenta sertifikadu lian inglés ba kada SEFOPE iha munisípiu, nune’e atualiza ba sistema.
Diresaun Jerál Formasaun Profisionál no Empregu no Diresaun Nasionál Empregu Estranjeiru fó-sai ba publiku kona-ba prosesu preparasaun ba kandidatu sira-ne’ebé mak atu ba serbisu iha Austrália.
Iha tinan kotuk, SEFOPE fó-sai kompromisu katak, sira-ne’ebé mak tuir teste eskrita maske valór lato’o, SEFOPE la hasai sira husi sistema, maibé nafatin fó oportunidade ba sira atu tuir kursu lian inglés hodi hadi’a sira-nia valór.
“Iita-nia kandidatu sira-ne’ebé mak iha tinan kotuk ho valór kiik, barak liu mak tuir kursu kada munisípiu sira inklui Dili, entaun sira barak mak simu ona sertifikadu no sira mai husu katak banhira mak atu update sira-nia valor,” Diretór Jerál SEFOPE, Carlito Rosário Cabral, informa liuhusi konferénsia imprensa iha Kaikoli, ohin.
Nune’e, Sekretáriu Estadu Formasaun Profisional no Empregu orienta Diretór Carlito Rosário Cabral, atu fó-sai ba públiku, kona-ba kandidatu sira-ne’ebé mak tuir ona kursu lian inglés ne’ebé hetan ona sertifikadu lian inglés.
“Bele ba update ita-boot sira-nia valór hodi hadi’a ita-boot sira-nia valór iha kada munisípiu ne’ebé mak uluk ita-boot sira ba halo teste ba,” nia fó hanoin.
Nia dehan, iha semana oin, loron 28 fulan-Abríl 2025 kandidatu sira-ne’ebé mak valór lato’o, maibé tuir ona kursu lian inglés iha ne’ebé de’it mak simu ona sertifikadu lian inglés nian bele atualiza ita-boot sira-nia valór iha kada munisípiu.
“Ami sei fó prioridade ba sira-ne’ebé uluk tuir teste, maibé valor lato’o, tanba ita seidauk loke ba públiku ne’ebé latuir prosesu, maibé ita só loke de’it ba kandidatu sira-ne’ebé tuir teste, liuliu sistema online ne’ebé mak sira-nia valór 49 mai kraik, mak tuir ona kursu lian inglés ho sertifikadu, entaun sira-ne’e mak bele ba update sira-nia valór iha kada munisípiu,” nia katak.
Entertantu, totál kandidatu traballadór iha primeiru eskrita ho valór di’ak hamutuk 7.813 iha territóriu tomak.
Jornalista : Felicidade Ximenes
Editór: Evaristo Soares Martins
