DILI, 22 Abríl 2025 (TATOLI)- Segundu Komandante Jerál Polísia Nasionál Timor-Leste (PNTL), Komisáriu Polísia Pedro Belo, enkoraja estudante Universidade Dili (UNDIL) atu foku de’it ba estudu no tenke hado’ok-aan husi violénsia, nune’e finaliza estudu bele muda futuru.
¨Ita mai iha kampus ne’e atu halo saida konserteza ita mai atu eskola, tanba ne’e iha oportunidade ida-ne’e ha’u husu ba ita boot sira hotu aproveita estudu fó oportunidade hodi halo atividade pozitivu. Kuadu imi fó prioridade ba atividade pozitivu rezultadu sei mai pozitivu. Tanba ne’e husu imi hotu iha ne’e labele mete problema tenke hakribi violénsia ha’u fiar imi nia futuru sei sai di’ak¨, dehan Segundu Komandante ne’e.
Komisáriu Pedro Belo hato’o asuntu ne’e bainhira hala’o intervensaun durante abertura atividade sosializasaun Lei Kódigu Estrada ho objetivu atu estudante universitáriu sira hatene regra utilizasaun transporte iha via públiku iha Universidade Dili, Maskarinas-Dili.
Biban ne’e, Segundu Komandante PNTL mós husu atu estudante sira foku estudu, maibé fó importansia mós ba vida, bainhira atu garante vida mak husu atu kumpre Lei Kódigu Estrada.
¨Dala barak ha’u haree estudante barak mak maioria utiliza motorizada la kumpre ba Lei Kódigu Estrada tanba husu kuandu lori karreta ka motór mai eskola tenke kumpre ba Lei kódigu estrada, liuliu karta kodusaun tenke no asesória motór tenke kompletu no respeitu ema la’o-ain¨, nia konklui.
Iha fatin hanesan,Diretór Diresaun Nasionál Tránzitu Rodaviaria Nasionál, Superintendente Assistentente Luis da Costa, mai partilla informasaun ba estudante sira oinsá atu iha konsiénsia bainhira utiliza transporte bele resepita Lei Kódigu Estrada.
Iha Sosializasaun ida-ne’e ho objetivu atu fó hanoin ba estudante sira utiliza transporte tenke kumpre ba Lei Kódigu Estrada númeru 6/2003 hodi redús asidente tráfegu.
¨Husu ba imi hotu atu lori transporte iha via públiku tenke respeita ba Lei Kódigu Estrada,” Diretór ne’e sujere.
Reitór no estudante UNDIL agradese PNTL
Entretantu, Reitór Interinu Universidade Dili (UNDIL), Francisco Martins, agradese ba estrutura PNTL liuliu Diresaun Tránzitu seguransa Rodaviáriu mai partilla Lei Kódigu Estrada ba estudante sira.
¨Ami agradese tanba sensebilizasaun sira hanesan ne’e importante atu hanorin estudante hodi lori karreta ka motór tenke respeita ba Lei Kódigu Estrada¨, nia afirma.
Nune’e mós, Estudante UNDIL, Marcelo dos Santos, sente kontente ho sosializaun tanba fó hanoin ba estudante iha nivél universtáriu sira kona-ba Lei Kódigu Estrada hodi prevene asidente tráfegu.
¨Ha’u hanoin sosializasaun ida ne’e importante ba ami atu lori transporte tenke tuir regra¨, nia konklui.
Jornalista: Natalino Costa
Editór: Florencio Miranda Ximenes
