DILI, 23 Abríl 2025 (TATOLI) — Ekipa konjunta husi Autoridade Inspesaun no Fiskalizasaun Atividade Económika, Sanitária no Alimentár (AIFAESA), Ministériu Komérsiu no Indústria (MKI), Inspesaun Jerál Estadu (IJT) taka provizóriu empreza Daia Marketing tanba kondisaun fatin la ijiene.
“Ekipa konjunta taka provizóriu empreza Daia Marketing tanba husi inspesaun haree kondisaun fatin la ijiene, entaun ami fó tempu ba empreza atu hadi’a tuir rekomendasaun ne’ebé mak ami-nia ekipa sei fó,” Sub-Inspetora Jerál AIFAESA, Quiteria da Costa, informa ba jornalista sira, iha Hudi laran, kuarta ne’e.
Nia dehan, husi inspesaun ne’e deteta ai-han sira estragadu no expiradu mak hanesan na’an-manu, na’an-fahi, es cream, masin-midar no foos ne’ebé ekipa sira foti, tanba latuir kritéria komersializasaun nian.
“Ita foti haree ba ijiene katak ladún di’ak, entaun ita deklara katak tenke taka provizóriu, maibé ba ai-han sira-ne’ebé mak liu prazu sei ba halo destroisaun iha lixeiru tibar,” nia afirma.
Diretora Planeamentu Operasionál Risku Alimentár no Laboratóriu (DPORAL) husi AIFAESA, I.P, Josefina Clarinha João, esplika, ohin ekipa taka provizóriu empreza Daia Marketing tanba kondisaun la ijiene.
“Ita haree foos estragadu no mós masin-midar estragadu no expiradu inklui na’an sira-ne’ebé mak estragadu, entaun husi ne’e mai observa kondisaun ijiene ne’ebé mak la prienxe atu tau ai-han sira,” Josefina Clarinha João informa.
Nia dehan, kona-ba sansaun admnistrativa la’o nafatin no nia prosesu determina koima hira no oinsá ba oin ne’e kabe ba iha inspitora jerál nia kompeténsia atu foti desizaun.
“Ita mós halo kolaborasaun ho Laboratóriu Saúde Nasionál liuhusi Diresaun Toxikolojia ne’ebé mak ami komunika no hetan autorizasaun atubele foti amostra na’an 10, lori ba halo teste atu hatene kona-ba kualidade mikrobiolojia nian, karik prezensa husi batéria ruma ka kímiku nian ne’ebé laboratóriu toxikolojia bele oferese atu teste formalin sira,” nia esplika.
Nune’e Jestór Operasionál husi Empreza Daia Marketing, Alberto dos Reis Pereira, koopera ho AIFAESA hodi taka Empreza Daia Marketing tanba kondisaun la ijiene.
“Ami koopera atu hadi’a ami-nia fatin, bainhira moos ona ami sei hateten tanba ami konsidera hodi asegura ai-han ne’ebé mak di’ak ba sidadaun sira-nia saúde,” Alberto dos Reis Pereira konklui.
Jornalista : Felicidade Ximenes
Editór: Evaristo Soares Martins
