Top

Ministru Justisa solisita Prezidente Repúblika molok nomea PGR foun tenke rona uluk Governu no KSMP

Ministru Justisa, Sérgio Hornai. Imajen TATOLI/António Daciparu

DILI, 24 Abríl 2025 (TATOLI)—Ministru Justisa, Sergio Hornai, solisita Prezidente Repúblika, José Ramos Horta, molok halo nomeasaun ba Prokuradór Jerál Repúblika (PGR-sigla portugés) foun, tenke rona uluk lai Governu no Konsellu Superiór Majistratura Ministériu Públiku (KSMP) nune’e prosesu hotu bele la’o tuir Konstituisaun haruka.

Governante ne’e esplika, tuir Konstituisaun Repúblika Demokrátika Timor-Leste (KRDTL), Prezidente Repúblika iha kompeténsia eskluziva nomea Prokuradór ida atu sai hanesan Prokuradór Jerál Repúblika hodi dirije instituisaun Ministériu Públiku.

“Tuir prosesu ne’e, Governu ne’e hanesan rona de’it. Konserteja iha-ne’ebá liu mós husi Primeiru-Ministru para troka hanoin ba futuru Prokuradór Jerál Repúblika atu haree kona-ba setór justisa nian nune’e halo servisu di’ak no dirije instituisaun ne’e bá iha setór justisa ne’e rasik,” Sergio hateten ba jornalista sira iha nia kna’ar fatin, Kolmera, kinta ne’e.

Nia esplika katak Ministru Justisa ne’e atu fasilita servisu PGR nian hodi oinsá mellora setór justisa ho di’ak, maibé kompeténsia ne’e Prezidente Repúblika no kabe bá iha Konsellu Superiór Majistratura Ministériu Públiku nia rekomedasaun.

Governante ne’e fiar nomeasaun ba kargu Prokuradór Jerál Repúblika, Prezidente Repúblika sei bazeia ba lei.

Rekorda fali katak mandatu Prokuradór Jerál Republika Alfonso Lopez sei terminadu iha 28 Abríl 2025.

Konstituisaun RDTL artigu 86 kona-ba Prezidente Repúblika nia kompeténsia ba órgaun sira seluk iha alínea K deskreve katak Prezidente Repúblika nia kompeténsia ida mak foti Prokuradór Jerál Repúblika nian hodi hala’o kna’ar iha tinan haat nia laran. No, artigu 133  husi Konstituisaun RDTL ne’ebé ko’alia  kona-ba Prokuradór Jerál Repúblika nian, iha alínea 3 fundamenta katak Prezidente Repúblika mak hatudu Prokuradór Jerál Repúblika ba mandatu tinan haat, nu’udár lei hateten.

Jornalista: Natalino Costa

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!