DILI, 24 Abríl 2025 (TATOLI)–Ministériu Juventude Desportu Arte no Kultura (MJDAK) hamutuk ho alumni Parlamentu Foinsa’e fasilita formasaun ba Membru Parlamentu Foinsa’e na’in-138, husi munisiípiu 12 inklui RAEOA no Ema ho Difisiénsia (EhD) sira.
Formasaun ne’ené realiza iha Sentru Formasaun Akadémika Polísia Comoro foin lalais ne’e, fó oportunidade ba formandu sira atu hetan koñesimentu kona-ba lideransa, dezenvolvimentu komunidade, edukasaun sivika, sistema eleitorál, planeamentu no orsamentu públiku, Life skill basic (LSB) no análiza sosiál.
Ministériu Juventude Desportu Arte no Kultura (MJDAK), Nélyo Isaac Sarmento, hatete Timor-Leste mak nasaun ne’ebé harii husi sofrimentu no limitasaun.
“Ita presiza vontade, voluntarizmu no pensamentu di’ak atu kontinua lori nasaun ba diresaun ne’ebé di’ak. Ita mai husi jerasaun frajil maibé iha podér atu muda mentalidade ba futuru,” Ministru Juventude Desportu Arte no Kultura (MJDAK), Nélyo Isaac Sarmento, hateten liuhusi nota ne’ebé Tatoli asesu husi mídia MJDAK, ohin.
Nia dehan, impaktu negativu husi mídia sosiál no husu ba juventude sira atu fó prioridade ba edukasaun no kontribui atu fó moris di’ak ba komunidade.
Membru Parlamentu Foinsa’e husi postu Cristu Rei, munisípiu Dili, Rainha Viegas Pinto, hateten formasaun ne’e importante tebes atu aumenta tan juventude sira-nia koñesementu no abilidade hodi prepara aan ba lideransa iha futuru.
“Formasaun ida ne’e la’ós de’it ba ami, maibé bele partilla fali ba komunidade, ba suku sira ne’ebé presiza tulun,” nia dehan.
Formasaun ne’e hetan kontribuisaun husi formadór sira husi Alumni Parlamentu Fpoinsa’e Nasionál (PFN) no tékniku MJDAK.
Jornalista : Hortencio Sanchez
Editór : Cancio Ximenes
