DILI, 24 Abríl 2025 (TATOLI) – Serimónia taka kaixaun Papa Francisco nian sei halo iha loron 25 Abríl kalan, iha Bazílika São Pedro.
Tuir Vatican News, serimónia ne’e sei halo iha tuku 20h00 oras Itália (tuku 3 madrugada otl), ne’ebé sei prezide husi Kardeál Kevin Farrell, Camerlengo Santa Igreja Romana.
Serimónia taka kaixaun ne’e sei partisipa husi Kardeál Giovanni Battista Re, Dekanu Koléjiu Kardinalísiu, Roger Michael Mahoni, Kardeál Presbíteru, Dominique Mamberti, Kardeál Protodiákonu, no Mauro Gambetti, Arsipreste Bazílika Papál São Pedro iha Vatikanu.
Aleinde ne’e, sei hetan mós prezensa husi Pietro Parolin, eis-Sekretáriu Estadu, Baldassarre Reina, Vigáriu Jerál ba Dioseze Roma, Konrad Krajewski, Ezmoleiru Sua Santidade no seluk tan.
Sira hotu sei reúne hamutuk iha Altár Konfisaun nian iha Bazílika São Pedro antes serimónia hahú.
Lembra katak, iha kuarta-feira dadeer tuku 9h00 oras Roma nian (iha Timor-Leste tuku 16h00), mate-isin maktoban Papa Francisco translada ona husi nia rezidénsia Casa Santa Marta bá Bazílika São Pedro, Vatikanu, nune’e sarani sira bele fó omenajen ikus ba líder Igreja Katólika ne’e.
Iha prosesu transladasaun ne’e, Koléjiu Kardeál sira no sarani liu rihun 20 mak akompaña ho basa-liman no saúda pasajen korpu Papa Francisco nian bá Bazílika São Pedro.
Depoizde hein oras lima nia laran, ho emosaun forte iha momentu ne’e, iha tuku 11h00 (tuku 18h00 otl) sarani sira komesa tama iha Bazílika hodi fó nia adeus ikus ba Santu Padre.
Bazílika loke to’o meia-noite iha loron kuarta no iha kinta tuku 7h00 dadeer loke fali no taka iha meia-noite. Iha 25 Abríl, nafatin loke iha tuku 7h00 dadeer to’o tuku 19h00 oras Vatikanu atu fó oportunidade ba sarani sira reza ba Papa.
Misa funerál Santu Padre sei hala’o iha Prasa São Pedro iha tuku 10h00 (iha Dili tuku 5 loraik), iha 26 Abríl, ne’ebé prezide husi Kardeál Giovanni Battista Re.
Depoizde misa hotu, mate-isin Papa nian sei lori bá Bazílika Santa Maria Maggiore iha Roma, Itália, iha fatin ne’ebé sei haloot tuir nia legadu espirituál.
Papa Francisco hakotu iis iha loron 21 Abríl iha Roma, iha tuku 7:35 oras lokál, iha nia rezidénsia Casa Santa Marta ho idade 88.
Notísia relevante: Mate-isin Papa Francisco iha ona Bazílika Vatikana hodi sarani sira presta omenajen
TATOLI
