Top

Governu organiza Simpóziu Jurídiku Nasionál atu mellora servisu setór justisa

Governu organiza Simpóziu Nasionál Jurídiku atu mellora servisu setór justisa. Imajen TATOLI/Natalino Costa

DILI, 25 Abríl 2025 (TATOLI)—Vise-Ministru Justisa Asuntu Fortalesimentu Inatitusionál, Paulo Remédios, organiza Simpóziu Jurídiku Nasionál ba reforma justisa liuliu bá iha Sentru Formasaun Jurídika Judisiária nune’e ba futuru bele prodús juíz, prokuradór, defensór inklui advogadu ho kualidade.

Governante ne’e hateten, tinan 20-resin Timor-Leste ukun-aan, rekursu umanu iha setór justisa sei menus no labele korresponde ba nesesidade setór Timor-Leste. Tanba ne’e mak Gabinete Vise-Ministru Asuntu Fortalesimentu Institusionál organiza Simpóziu Jurídiku Nasionál hodi konvida entidade sira hanesan Koordenadora Grupu Traballu Reforma Justisa, Lúcia Lobato, Diretora Sentru Formasaun Jurídika Judisiária no Sosiedade Sivíl ne’ebé toma konta ba área Justisa hodi buka dalan oinsá reforsa Sentru Formasaun Jurídika Judisiária hodibele aumenta rekursu iha área setór justisa no oinsá prodús autór judisiáriu ho kualidade.

“Ita tenke moderniza Sentru Formasaun Jurídika Judisiária. Husi 2002-2025 iha setór justisa, ita hetan kuadru ida natón de’it, juíz 34, prokuradór 37 no defensór públiku 34. Entaun, ita bele kestiona, tanba ne’e ita halo simpóziu ida-ne’e hodi kestiona tanbasá mak ita iha tinan 23 ona no ita iha sentru formasaun tinan 10 maibé autór justisa nafatin de’it ka la aumenta,” nia afirma.

“Tanba ne’e, ita tenke halo melloramentu iha númeru profisionál no kualifikadu,” nia informa.

Iha fatin hanesan, Koordenadora Grupu Traballu Reforma Justisa, Lúcia Freitas Lobato hateten IX Governu Konstitusionál mai ho kompromisu hodi halo reforma iha setór justisa nune’e setór justisa ne’e fó asisténsia justisa ho di’ak.

Lucia Lobato dehan, iha tinan kotuk, Governu halo tiha ona alterasaun ba formasaun sira-ne’ebé la’o iha Sentru Formasaun Jurídika Judisiária.

“Governu ida agora ne’e hakarak haforsa Sentru Formasaun Jurídika Judisiária sai sentru formasaun ne’ebé eselente oinsá bele prodús autór judisiáriu sira ho kualidade,” nia tenik.

Antiga Ministra Justisa ne’e hatutan, rekomendasaun husi Grupu Traballu Reforma Justisa, bazeia ba rezultadu diagnóstiku katak infraestrutura no fasilidade iha Sentru Formasaun Jurídika Judisiária ne’e importante, nune’e bele prodús autór judisiáriu ne’ebé kualidade.

Entretantu, Diretór Ezekutivu Asia Justice And Rigth (AJAR), José Luís Oliveira, husu ba Governu presiza investe iha Sentru Formasaun Jurídika Judisiária.

“Ita tenke kestiona tanbasá mak tinan 23 ita sei menus iha juíz, prokuradór no defensór. Ita tenke investe duni nune’e Sentru Formasaun Jurídika Judisiária bele halo nia kna’ar ho di’ak liután,” nia konklui.

Jornalista: Natalino Costa

Editór: Xisto Freitas da Piedade

Publisidade

Leave a Reply

Latest Post

error: Content is protected !!