APC rejista uma 88 hetan estragu husi dezestre naturál iha Abríl
DILI, 28 Abríl 2025 (TATOLI)—Autoridade Protesaun Sivil (APC), rejista uma hamutuk 88 ne’ebé afeta husi dezastre naturál hanesan dezastre anin boot, rai halai, ahi han, bee-sa’e ne’ebé akontese entre 14-28 Abríl 2025, no rejista mós ema ida lakon vida no ema na’in-rua kanek.
“Semana rua ne’e iha rejiaun Timor-Leste normál no APC rejista tipu dezastre hanesan anin boot estraga uma 44, rai halai estraga uma 10, ahi han uma hamutuk hitu (7), bee sa’e iha sia (19), lakon vida ida (1), kanek rua (2). Prienxe kritéria hamutuk 29, ahi han hamutuk hitu (7) apoiu de’it emerjénsia hamutuk 55, númeru ema afetadu hamutuk 396, ema evakua hamutuk 23, uma estragu hamutuk (80) inklui ema ida lakon vida ida (1) no kanek na’in rua (2),” Nelson hateten liuhusi konferénsia imprensa ne’ebé hala’o iha edifisiu APC Kaikoli, segunda ne’e.
Entretantu, munisípiu ne’ebé afeta ba dezastre mak hanesan munisípiu Ainaru ahi han uma ida (1), munisípiu Baukau anin sobu uma tolu (3), munisípiu Dili anin sobu uma ida (1), munisípiu Ermera rai halai ualu (8), munisípiu Likisa lakon vidaida (1) no kanek rua (2), munisípiu Manufahi anin sobu uma rua (2), RAEAO ahi han uma haat (4), munisípiu vikeke anin sobu uma rua (2) no ahi han uma ida (1).
Relasiona ho uma ne’ebé hetan estragu, parte APC halo kedas verifikasaun no levantamentu dadus hodi pakote emerjénsia hanesan ai-han no la’ós ai-han ba vitima sira afetadu dezastre.
Iha biban ne’e, Portavós Nelson Nunes de Orleans informa daudaun ne’e APC halo distribuisaun apoiu rekoperasaun ba vítima afetadu dezastre tinan 2024, ne’ebé hahú uluk husi munisípiu Ainaru uma kain 16 no munisipiu Aileu 17, inklui mós vitima afetadu husi munisípiu sira seluk iha territóriu Timor-Leste.
Jornalista : Hortencio Sanchez
Editór : Cancio Ximenes
