DILI, 28 Abríl 2025 (TATOLI)–Komandante Polísia Nasionál Timor-Leste (PNTL) munisípiu Dili, Superintendente Xefe Orlando Gomes, hateten PNTL asegura ona suspeitu kazu sona malu iha Karantina Tasi-Tolu hodi kumpre oras 72 hafoin aprezenta ba Ministériu Públiku (MP). Kazu ne’e akontese tanba problema privadu.
“Iha duni kazu ida-ne’ebé mak akontese iha mini merkadu Karantina Tasi-Tolu iha loron sábadu (26/04) kalan maisumenus tuku 16h30, kazu ne’e ita kaptura kedan suspeitu hodi lori ba detein oras 72, kona-ba vítima ita kontakta kedan ambulansia hodi evakua kedan ba Ospitál Nasionál Guidu Valadares Dili hodi halo tratamentu,” Orlando hateten ba jornalista sira iha Komandu PNTL Munisípiu Dili, segunda ne’e.
Nia dehan, kazu ne’e sona malu entre mane na’in –ua (2), vitima hetan sona ho tudik iha parte kanotak maibé la rezulta vítima lakon vida maibé daudaun ne’e halo hela tratamentu intensivu.
“Kona-ba kazu ida-ne’e nia motivu tanba sira odiu malu tanba duun malu na’ok manu madena. Nune’e mak iha momentu ne’ebá suspeitu toba hela no suspeitu nia ferikoan prepara-aan atu ba tuir misa, maibé vítima hakat ba iha suspeitu nia uma ko’alia ho suspeitu nia ferikoan kona-ba dun-malu na’ok ne’e, entaun vítima basa suspeitu nia ferikoan ho nune’e mak suspeitu hadeer mai foti tudik sona kedan vítima monu iha fatin,” nia dehan.
Tanba ne’e, kazu ne’ebé PNTL rezista tama ba iha kategoria tentativa omesidu no konzuga kedan ho lei arma-branka númeru 5/2017 artigu 12 kona-ba utilizasaun arma-branka.
“Kona-ba evidénsia sira ita rekolla hotu ona hein de’it ita atu submete ba iha prosesu. Daudaun ne’e vítima halo hela tratamentu, vítima ho naran Victór Goveia da Crus no suspeitu ho naran insiál CC,” nia dehan.
Jornalista : Hortencio Sanchez
Editór : Cancio Ximenes
