DILI, 30 Abríl 2025 (TATOLI)—Prezidente Repúblika, José Ramos Horta, kuarta ne’e, hasoru malu ho Vise-Chairman of the National Committe of the Chinese People’s Political Consultative, Leung Chun-ying, hodi ko’alia kona-ba oinsá atu hametin kooperasaun entre parte rua hodi promove saúde públiku iha Timor-Leste.
“Ohin, ami mai hasoru malu ho Prezidente Repúblika José Ramos Horta ko’alia kona-ba oinsá atu hametin kooperasaun atu promove saúde públika iha Timor-Leste,” Leung Chun-ying hateten ba jornalista sira hafoin remata enkontru ho PR José Ramos Horta iha Palásiu Prezidensiál Nicolau Lobato, Bairru Pite, Dili.
Nia dehan, misaun importante sira-nian iha Timor-Leste mak oinsá atu hadook ema hotu husi moras liuliu dengue.
Nia hatutan, enkontru ne’e foka ba inisiativa saúde ne’ebé la’o daudaun no projetu foun ne’ebé mai ho objetivu atu hadi’a saúde públika iha Timor-Leste.
Durante konversa sira, Leung destaka progresu sira-ne’ebé halo ona iha kontrolu isin-manas dengue nian, projetu konjuntu ida entre Fundasaun GX no autoridade lokál sira.
Nia relata redusaun signifikante besik 70% iha kazu moras dengue kompara ho tinan kotuk.
Leung mós nota tendénsia pozitivu ida iha asesibilidade kuidadu saúde nian, ho sidadaun barak liu agora depende ba ospitál munisipál lokál sira duké halo viajen ba Dili hodi hetan tratamentu dengue nian.
Antes ne’e, Fundasaun GX anunsia planu sira atu fó doasaun maizumenus 17,000 kit teste rápidu dengue nian ba ospitál sira iha nasaun tomak.
Doasaun ne’e ho objetivu atu bele deteta sedu no tratamentu moras dengue iha nivel lokál, hamenus todan ba fasilidade sentrál sira iha Dili.
Adisionalmente, Leung introdús projetu foun ida atu hadi’a kualidade bee-hemu nian uza nanoteknolojia, ne’ebé inisialmente sei alvu ba espasu públiku sira hanesan ospitál sira, igreja sira no eskola sira.
Prezidente Horta hatudu interrese partikulár ba projetu hadi’a kualidade bee no kontrolu ba dengue ida-ne’e, hodi rekoñese ninia importánsia ba saúde públika.
Enkontru ne’e kobre mós grupu Mídia Xina nia prezensa iha Timor-Leste hamutuk ho Fundasaun GX ba kooperasaun mídia Xinés ho mídia Timor-Leste.
Kolaborasaun entre Timor-Leste no Fundasaun GX ida-ne’e reprezenta pasu signifikativu ida hodi rezolve preokupasaun saúde ne’ebé krítiku no hadi’a infraestrutura públika iha nasaun ne’e.
Jornalista : Hortencio Sanchez
Editór : Cancio Ximenes
