DILI, 30 Abríl 2025 (TATOLI)—Diretór Jerál Sekretaria Estadu Formasaun Profisionál no Empregu (SEFOPE), Carlito Rosário Cabral, hateten kooperasaun entre Governu Timor-Leste ho Nova Zelándia iha ona rezultadu pozitivu atu rekruta traballadór timoroan ba programa laborál iha nasaun ne’ebá.
“Joven sira tenke prepara aan atu aprende lian ne’e. Ami hatene katak ekipa SEFOPE ida iha Nova Zelandia no informa mai ami katak negosiasaun ne’e iha ona rezultadu pozitivu atu asina akordu iha tempu badak hodibele rekruta ita-nia joven sira bá servisu iha rai-li’ur,” Carlito Cabral hateten ba Tatoli, iha Kaikoli, kuarta ne’e.
Nia esplika, objetivu husi akordu entre nasaun rua ne’e atu hadi’a ekonomia família no kampu traballu iha Timor.
Notísia relevante: SEFOPE ho Nova Zelándia sei asina MOU ba programa laborál
Tuir Pájina Ofisiál Imigrasaun Nova Zelándia nian, programa sazonál ne’e ajuda empregadór sira iha setór ortikultura no vitikultura ne’ebé rekruta traballadór estranjeiru sira, liuliu hosi nasaun pasífiku sira.
“Hahú loron 28 Abríl 2025, Timor-Leste aumenta ona ba lista nasaun sira-ne’ebé bele partisipa iha programa sazonál. Empreza sira bele rekruta traballadór timoroan hahú hosi loron ne’e hodi ba serbisu iha Nova Zelándia,” nia haktuir.
Tuir nota, kandidatu timoroan sira ba programa traballu tenke aprezenta dokumentu sira hanesan atestadu médiku liuhosi Raiu-X.
Jornalista: Felicidade Ximenes
Editór: Xisto Freitas da Piedade
