BOBONARU, 03 Maiu 2025 (TATOLI)—Vise-Primeiru-Ministru Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, kongratula jornalista sira iha ambitu komemora loron liberdade imprensa mundiál ne’ebé mundu selebra iha loron 03 Maiu kada tinan.
Vise-Primeiru-Ministru Assanami husu jornalita sira iha Timor-Leste atu servisu ho profisionál liuhusi publikasaun notísia sira.
“Ne’ebé, dala ida tan, parabéns ba jornalista hotu-hotu inklui jornalista Timor-Leste ka jornalista nasionál, maske imi iha situasaun ne’ebé defisil maibé imi mak sai instrumentu direitu povu para atu hetan informasaun, direitu povu para atu hatene lala’ok ukun nian, direitu povu para atu kontrola transparánsia ne’e mak husi mídia nia kontrola. Ita-nia nasaun ne’e nasaun demokrátika, presiza mídia, mídia tenke la’o, ita presiza dezenvolve mídia,” Assanami hateten ba jornalista sira hafoin halo inspesaun direta ba konstrusaun uma dignu iha aldeia Tunu Bibi, auku Tapo-Memo, postu administrativa Maliana, munisípiu Bobonaru, sesta ne’e.
Nia konsidera, papél jornalista importante iha prosesu demokrasia tanba ne’e presiza respeita jornalista sira-nia servisu.
“Primeiru, atu dala ida tán hakruk ba eroi hotu-hotu ne’ebé mak mai husi jornalista mate iha funu laran. Iha ita-nia kontestu Timor-Leste, ita hatene jornalista hira kedan mate iha funu laran, ne’ebé ita ho hakruuk fó omenajen ba sira,” nia dehan.
Nia dehan, mídia ne’e nu’udar instrumentu importante atu mundu ne’e nakloke importante atu halo mundu ne’e NIA konetividade mundu iha transformasaun iha siénsia ne’e mai husi mídia, tanba ne’e mídia ne’e importante tebe-tebes no mídia nu’udár klamar ba demokrasia liuliu nasaun hotu-hotu ne’ebé demokrátiku ninian espíritu nia klamar mak mídia ne’e duni.
“Mídia tenke livre no tenke sai instrument, tanba demokrasia iha kritériu tolu importante. Ida, mak laiha ema idaké iha demokrasia nee iha lia-loos no lia-loos ne’e ita tenke tau iha mídia, tau iha públiku, ema bele diskute no bele debate. Segundu, mak mídia mak sai fatin para luta rasusinu ne’e la’o, debate ka diskusaun kritéria no auto kritika ne’ebé ke iha no demokrasia laiha monopoli lia-loos tanba mídia ne’e sai instrumentu,” nia dehan.
Jornalista : Natalino Costa
Editór : Cancio Ximenes
