DILI, 06 Maiu 2025 (TATOLI)—Prezidente Repúblika, José Ramos Horta, tersa ne’e, hamutuk ho Ministru Negósiu Estranjeiru no Kooperasaun (MNEK) Bendito Freitas, Sekretariu Estadu Administrasaun no Finansas Angola Osvaldo dos Santos Varella no Embaixadór Angola iha Timor-Leste José Andrade de Lemos, inaugura edifísiu Embaixada Angola iha Timor-Leste, iha Dili.
“Bem-Vindu ba Embaixada Angola iha Timor-Leste, ne’ebé inaugura ona. Antes ne’e, konversa di’ak tebes ho Prezidente Repúblika Angola oferese mós fatin ba Timor-Leste loke Embaixada iha Luanda iha andar ida-ne’ebé luan no kapas,” Horta hateten iha nia diskursu iha serimónia inaugurasaun ba edifisiu ne’e.
Nia dehan, estabelesimentu ba Embaixada ne’e hametin liután kooperasaun billaterál entre Timor-Leste ho Angola.
“Ha’u-nia intervensaun mak ne’e, agradese boot tebes ba Ângola ne’e fó solidariade boot tebes ba Timor-Leste iha tinan barak ba kotuk, ita nia amizade sempre metin no ohin loke ona Emvaxada iha Timor-Leste hametin liutan ita nia kooperasaun billaterál,” Horta tenik.
Ministru Negósiu Estranjeiru no Kooperasaun (MNEK), Bendito Freitas, reforsa tan onra imensu no satisfasaun kle’an mak fó bem-vindu ba inaugurasaun ofisiál Embaixada Angola nian iha Dili, momentu emblemátiku hanesan ne’e ne’ebé reforsa lasu istóriku, kulturál no polítiku ne’ebé nasaun rua fahe kle’ur ona.
“Embaixada ida-ne’e la’ós de’it edifísiu fíziku ida, maske iha importánsia ne’ebé maka’as tebes, agora sai nu’udar símbolu moris no dinámiku ba amizade, solidariedade no kooperasaun entre Ângola no Timor-Leste, nasaun rua ne’ebé nia istória halibur sira, hodi halo sira sai maun-alin no parseiru ba nafatin,” Bendito tenik.
Nia dehan, abertura ba misaun diplomátika ida-ne’e reprezenta pasu desizivu ida hodi aprofunda relasaun bilaterál sira, ne’ebé marka tiha ona ho valór komún sira, hahú hosi luta todan ba independénsia, defeza soberania no kompromisu ba dezenvolvimentu sustentável no moris-di’ak povu nasaun rua nian.
“Ohin, ita inaugura Embaixada Repúblika Ângola nian iha Dili presizamente iha tinan ne’ebé Timor-Leste marka aniversáriu ba da-50 autoproklamasaun independénsia nian no inísiu tuirmai ba ninia luta foun ba libertasaun no iha tinan ne’ebé Angola selebra, presizamente iha fulan-Novembru oin mai, tinan 50 ninia independénsia,” nia hateten.
Nia hatutan, loron ohin marka istória ida tan iha relasaun bilaterál sira, sinkronidade data sira-nian mak simbóliku tebes ba pasadu komún, ba luta no realizasaun komún maske ho maneira oioin no meridianu sira-ne’ebé dook.
Ida-ne’e mós reprezenta profundamente kompromisu boot-liu ne’ebé halo ba povu sira katak liberdade, manutensaun ba pás no dezenvolvimentu.
“Ita moris iha era ida-ne’ebé kooperasaun internasionál esensiál atu hasoru dezafiu globál sira, husi promove pás no seguransa to’o kombate dezigualdade sosiál sira no efeitu sira husi mudansa klimátika. Iha ámbitu ida-ne’e, Embaixada ida-ne’e sei sai nu’udár sentru vitál ba diálogu polítiku, promosaun komérsiu, interkámbiu kulturál no kooperasaun téknika entre Timor-Leste no Angola,” nia dehan.
Nia relembra, iha tinan kotuk, asiste progresu signifikativu iha konsolidasaun parseria ho abertura Embaixada Timor-Leste nian iha Luanda iha Jullu liubá no formalizasaun akordu kooperasaun importante tolu entre Ângola no Timor-Leste.
“Akordu hirak ne’e kobre izensaun ba vistu ba titulár pasaporte diplomátiku no servisu nian, konsulta polítika no formasaun diplomátika, hametin mekanizmu ba diálogu no kooperasaun entre ita-nia governu sira. Abertura Embaixada ida-ne’e reprezenta mós oportunidade renovadu ida atu esplora área foun sira kooperasaun nian, nomeadamente iha área edukasaun, saúde, agrikultura, enerjia, komérsiu no mós investimentu entre Timor-Leste no Angola,” nia dehan.
Estabelesimentu misaun diplomátika ne’e sei reforsa mós prezensa afrikanu iha Timor-Leste, nune’e enrikese diálogu entre nasaun maun-alin sira.
“Ha’u hakarak destaka katak prezensa Embaixada Angola nian iha Dili nesesariamente hametin mós Komunidade País sira ho Lian Portugés (CPLP), ne’ebé ita na’in-rua halo parte ho orgullu. Tanba ne’e, espasu diplomátiku ne’e sei sai hanesan pontu konverjénsia ida ba inisiativa konjunta sira-ne’ebé promove lian portugés, kultura no interrese komún sira iha palku internasionál,” nia hateten.
Sekretariu Estadu Administrasaun no Finansa Osvaldo dos Santos Varella hateten, agradese ba Estadu Timor-Leste ne’ebé oferese ona fatin ba Angola harii Embaixada hodi hala’o servisu diplomata hodi hametin relasaun bilaterál nasaun rua nian.
“Agradese tanba iha inaugurasaun ne’e marka prejensa direta husi Prezidente Repúblika José Ramos Horta, ida-ne’e hatudu ita-nia kooperasaun metin no di’ak liutan ba oin, agradese tanba bele oferese ona fatin ba ami hodi estabelese Embaixada iha ne’e, ita-nia relasaun metin tebes ba oin,” nia esplika.
Jornalista : Hortencio Sanchez
Editór : Cancio Ximenes
