DILI, 07 Maiu 2025 (TATOLI)–Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA,I.P), kuarta ne’e, taka provizória Loja W Four Supermerkadu Audian, tanba kondisaun la ijiene.
”Ami ohin mai taka provizória Loja W Four Supermerkadu Audian, tanba antes ne’e ami mai halo ona inspesaun iha loron 25 Abríl, tinan ne’e, iha-ne’ebá ekipa sira deteta ona sasán sira estragadu, espiradu no falta kumpri rekizitu. Ami konsentra maka’as iha ijiene nian katak armazeinamentu ne’e kondisaun la ijiene,” Diretora Planeamentu Operasionál Risku Alimentár no Laboratóriu (DPORAL) husi AIFAESA, Josefina Clarinha João dehan ba jornalista sira, iha Loja W Four Audian.
Nia esplika, antes ne’e ekipa AIFAESA fó ona rekomendasaun nune’e empreza tenke kumpri atu hadi’a kondisaun ijiene.
”Antes ne’e ami-nia ekipa fó ona rekomendasaun ba empreza W Four Audian atu kumpri, maibé realiadade kondisaun la ijiene nafatin. Nune’e, ohin ami mai taka provizória atu sira hadi’a sira-nia fatin,” Josefina tenik.
Notísia relevante: AIFAESA taka provizóriu empreza Daia Marketing
Nia haktuir, hahán estragadu sira-ne’ebé mak iha ekipa hasai hotu iha konjeladu laran hodi tau hamutuk sei bá halo destroisaun.
”Hahán estragadu ne’ebé ami hasai iha konjeladu laran mak hanesan na’an-manu, ikan salmo no naget sira ami sei halo destroisaun,” nia hateten.
Diretora ne’e hatutan, kona-ba prosesu administrativu selu koima ida-ne’e sei la’o bá-oin.
Bainhira jornalista sira tenta atu entrevista jestór W Four Audian kona-ba asuntu ne’e, maibé nia lakohi fó komentáriu.
Jornalista: Felicidade Ximenes
Editór: Xisto Freitas da Piedade
