DILI, 07 Maiu 2025 (TATOLI)- Sekretáriu Estadu Asuntu Toponímia no Organizasaun Urbana (SEATOU), sei kontinua halo alargamentu ba uma-kain 200 iha Tasi-tolu ne’ebé antes ne’e tau ona markasaun ba despezu administrasaun, hafoin prosesu alargamentu iha Kuluhun to’o Fatuahi ramata.
Sekretáriu Estadu Asuntu Toponímia no Organizasaun Urbana, Germano Santa Brites Dias informa katak markasaun despezu administrativa uma-kain 200 iha Tasi-tolu ne’e hein tempu.
“Horibainhira ita haka’as aan atu selebra loron boot ne’ebé ita-nia Sua santidade Papa Francisco mai vizita iha timor tinan kotuk ne’e. Tanba ne’e, ita haka’as aan hadi’a tiha fatin ne’e hodi halo altar hodi misa, no mós foindauk ita kontinua hamoos fatin ne’ebá para bele halo misa ba fúnebre Amu Papa nian”, Sekretáriu Estadu hateten ba jornalista iha aldeia Moris Foun, suku Komoro, ohin.
Governante ne’e informa, solusaun ba markasaun ne’e, kuandu servisu alargamentu estrada Kuluhun ba Fatuahi ne’e la’o loos no hotu ona foin ita halo fali servisu iha fatin seluk ne’ebé tau ona markasaun ne’e tanba mandatu Governu da-sia nian sei hela tinan rua ka tolu tan.
“Nune’e ita sei kontinua halo servisu sira-ne’e. Normalmente, presiza hala’o neneik no la’o ho di’ak atu nune’e labele mosu dezintendimentu iha terrenu”, nia dehan.
SEATOU akresenta, maske iha komunidade balun ne’ebé la koopera hodi kontinua harii uma iha altar Tasi-tolu nia kotuk, no fó ona avizu se mak kontinua halo uma iha ne’ebá sei la tolera hodi hamumuk fatin, tanba ita kuandu fó avizu ba fatin ne’e, entaun sei akontese alargamentu.
Enkuantu, bainhira komunidade ne’e mak hetan ona osan indemnizasaun atu buka fatin ne’ebé seguru atu ba futuru bele harii uma ne’ebé metin, tanba bainhira komunidade mak kontinua halo uma iha fatin ne’ebé proibidu, sira sei haruka sira sobu rasik, maibé se sira lakohi entaun SEATOU mak sei sobu no ida-ne’e sira lakon saugati tanba Governu selu indemnizasaun dala ida, la’ós dala-rua ka dala-tolu.
“Se mak iha osan ba kuda fali osan iha fatin risku ne’e ninia problema tanba ita iha dadus kompletu ita sei kontrola buat ne’ebé rigorozu. Governu ajuda tiha ona selu la’ós komunidade sira atu kontinua halo fali buat seluk ne’ebé Governu bandu ona”, nia hateten.
Sekretáriu Estadu Asuntu Toponímia no Organizasaun Urbana, Germano Santa Brites Dias husu baa komunidade sira-hotu atu akompaña no koopera ho Estadu inklui Governu atu hala’o servisu ne’e ho di’ak no dezenvolve ba rai ne’e.
“Aleinde ne’e progresu kona-ba alargamentu estrada kuluhun ba Fatuahi daudaun ne’e servisu la’o hela husi kompaña ne’ebé kaer projetu ne’e,” nia informa.
Entretantu, tuir observasaun husi jornalista nian iha terenu, kompana Montana di’ak kontinua hala’o hela servisu fíziku hanesan kee bee-dalan hodi halo valeta, loke espasu ba markasaun sira ne’ebé tau ona no kontinua mós sobu uma sira-ne’ebé tau markasaun.
Jornalista: Alexandra da Costa
Editór: Rafael Ximenes de A. Belo
