DILI, 08 Maiu 2025 (TATOLI)—Autoridade Inspesaun Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), kinta ne’e, reativa negósiu Empreza Daia Marketing.
“Ohin ami mai reativa negósiu Empreza Daia Marketing, tanba antes ne’e sira komete infrasaun liga bá ijiene, infrasaun sasán estragadu ne’ebé liu prazu. Taka iha loron 24 Abríl tinan ne’e. Ami fó tempu fulan ida, maibé semana rua de’it sira kumpri rekizitu,” Sub-Inspetora Jerál AIFAESA, Quitéria da Costa, dehan ba jornalista sira, iha Bairru Pité.
Sub-Inspetora ne’e sujere ba jerente empreza sira katak karik sei kontinua halo infrasaun mak bá futuru AIFAESA sei mai taka permanente loja referida.
“Kona-ba administrasaun selu koima, ida-ne’e sei iha hela prosesu nia laran, tanba ha’u seidauk bele fó informasaun kona-ba administrasaun nian,” Quitéria informa.
Notísia relevante: AIFAESA taka provizóriu empreza Daia Marketing
Nia haktuir, AIFAESA mós reativa empreza 12 iha Dili no munisípiu sira-ne’ebé antes ne’e taka provizória.
“Empreza 12 ne’ebé mak antes ami taka provizória, sira kumpri ona rekizitu entaun ami mai reativa hodi sira halo atividade hanesan baibain. Iha Oekusi ami reativa loja rua hanesan Plaza Bakara no Kihun Jen. Dili laran nian mak Loja Lilis Bakery, Loja Lisun, Paderia Pão Brasão, Loja Prisos, Paderia Kuluhun no seluk tan,” nia esplika.
Iha fatin hanesan, Jerente Empreza Daia Marketing, Alberto dos Reis Pereira, dehan sira koopera di’ak ho ekipa AIFAESA, nune’e iha semana rua nia laran prenxe rekizitu ne’ebé eziste hodi reativa negósiu.
Jornalista: Felicidade Ximenes
Editór: Xisto Freitas da Piedade
